Mateus 26

O Isus molini pe ani Getsimanija

36 Tegani o Isus dželo ple učenikonencar ko than vičime Getsimanija, i phenđa lenđe: "Bešen akate đikote me džava adari hem molinav man."

37 Peja lelja e Petre hem soduje čhaven e Zevedejeseren. Pelo lese žal hem pharipe, 38 i phenđa lenđe: "Edobor injum žalosno da mlo vilo ka pharjol! Ačhoven akate hem džangale pazinen mancar."

39 I dželo hari po dur, pelo mujeja đi phuv hem molinđa pe vaćerindoj: "Dade mleja, te šaj, cide akaja čaša e patnjaja mandar. Ali, nek ovel pali ti volja, a na pali mli."

40 Tegani irinđa pe koro učenici hem arakhlja len sar sovena, i phenđa e Petrese: "Ah, našti li ine nijekh sati džangale te pazinen mancar! 41 Džangale pazinen hem molinen tumen te na peren ko iskušenje. O duho mangela te ćerel okova soi šukar, ali o teloi bizoralo."

42 I palo dujto puti dželo hem molinđa pe vaćerindoj: "Dade mleja, te našti te cide mandar akaja čaša e patnjaja, te na pijav olatar, nek ovel pali ti volja."

43 I palem, kad irinđa pe, arakhlja len sar sovena adalese so phandljona ine lengere jaćha. 44 Ov ačhavđa len hem palem dželo po dur, i trito puti molinđa pe, vaćerindoj ista lafija.

45 Tegani irinđa pe koro učenici hem phenđa lenđe: "Pana li sovena hem odmorinena? Ače, alo o sati kad me, o Čhavo e manušesoro, ka ovav dindo ko vasta e grešnikonengere. 46 Ušten! Hajde! Ače mlo izdajniko avela."