Matej 9

O Isus sasljari e namborma đuvlja hem vazdela taro mule e čhajorja

18 Sar o Isus vaćeri ine adava, alo jekh vođa e sinagogakoro, pelo ko kočija anglo Isus hem phenđa: "Mli čhaj akana muli. Ali tu ava hem čhiv to vas upro late hem oj palem ka živini."

19 O Isus uštino hem ple učenikonencar dželo palo leste. 20 I dikh, nesavi đuvli kolatar dešu duj berš thavdinđa rat nakhini odpalal e Isusese hem dolinđa pe upro lesere fostanesoro krajo, 21 adalese so phenđa ana peste: "Samo te dolav man upro lesoro fostani, ka ovav sasljardi."

22 O Isus irinđa pe, i kad dikhlja la, phenđa laće: "Ma dara, mli čhaj, ti vera sasljarđa tut."

I oj odmah saslili.

23 Kad o Isus đerdinđa ko čher e sinagogakere vođasoro, dikhlja e manušen kola zbog i muli čhaj bašalena flaute hem averen kola galaminena. 24 I phenđa lenđe: "Džan tumenđe! I čhajori na muli, nego sovela."

I on asandile lese.

25 Kad o manuša inele ikalde avri, o Isus đerdinđa adari kaj inele i čhajori, dolinđa la oto vas hem oj uštini. 26 I adava šundilo ko sa adava krajo.