17 Nikase ma irinen bišukaripe zako bišukaripe. Dikhen te ćeren okova soi šukar anglo jaćha sa e manušenđe. 18 Te šaj – kobori đi tumende – živinen ano mir sa e manušencar. 19 Ma osvetinen tumen korkore, mle manglalen, nego ačhaven than e Devlesere holjaće. Adalese so ano Sveto lil pisini: "I osvetai mli, me ka irinav lenđe" – vaćeri o Gospod. 20 Umesto adava:
"Tei to neprijatelj bokhalo, de le te hal,
hem tei žedno, de le te pijel.
Adalese so, te ćerđan ađahar,
ka čhore lese jagalo žaro upro šero – ka lađare le."
21 Ma muk o bišukaripe te pobedini tut, nego tu pobedin o bišukaripe šukaripnaja.