João 12

O Isus del ando Jerusalim

12 Thejara o đes o but o them save aviline po prazniko Pasha, ašundine kaj o Isus avel ando Jerusalim, 13 line e palmenđe krandže, teljardine angle leste thaj čhonas muj:

"Hosana!

Blagoslovime si okova savo avel ando alav e Gospodesko!

Nek avel blagoslovime o Caro e Izraelosko!"

14 A o Isus arakhlas terne magarco thaj uzjašisarda les, sago kaj si ramome ando Sveto lil:

15 "Na daran, manušalen andar o Jerusalim!

Ake, avel ćiro caro gajda kaj jašil e terne magarco!"

16 Lešće učenikurja askal či haćardine godova, ali kana o Isus sas vazdino ande piri slava, dine pe gođi kaj ando Sveto lil ramol pale leste baš okova so askal ćerdine lešće.

17 A o them savo sas e Isuseja kana akhardas e Lazare te inkljel andar o limori thaj vazda les andar e mule, svedočinas pale godova. 18 Zato o but o them vi inkljisto angle leste, kaj ašundine kaj si vo godova savo ćerda o čudesno znako.

19 Askal e fariseja phendine jek avrešće: "Dićhen kaj khanči či vredil! Eke sa o them džal pale leste!"