Marko 5

O Isus sastarel e manuše ande kaste si e benga

1 Askal avile pe aver rig katar o jezero, ando gerasinsko krajo. 2 Thaj samo so o Isus inkljisto andar e lađica, odma angle leste avilo andar e limorja jek manuš ande savo sas o bilačho duho. 3 Akava manuš trajilas ande limorja thaj khonik majbut našti phandelas les čak ni ande lancurja. 4 But drom phandenas lešće vas thaj lešće pungre ande lancurja, ali vo trgolas e lancurja thaj phađelas e okurja pe pešće pungre, thaj khonik nas gaći zuralo te inćarel les. 5 Stalno, e đesenca thaj e raćenca lutilas pe limorja thaj pe bregurja, rknjilas thaj pećelas korkoro pes e barenca. 6 Kana dadural dikhla e Isuse, prastaja dži leste thaj pelo angle leste pe pešće koča, 7 thaj andar o sa glaso e rknjimava phendas: "So kames mandar, Isuse, Čhaveja e Majbare Devlesko? Dav tut solah e Devleja te na mučis man!" 8 Kaj, o Isus već phendas lešće: "Bilačho duhona, inklji andar o manuš!" 9 Askal phučla les: "Sar bučhos?" A vo phendas lešće: "Mungro alav si legija kaj sam but duhurja ande akava manuš sago vojska." 10 Thaj uporno molilas e Isuse te na tradel len andar godova krajo. 11 A okote po brego čarjolas o baro krdo bale, 12 thaj e bilačhe duhurja zamolisardine e Isuse: "Bičhal amen ande okola bale, te das ande lende." 13 O Isus mukhla len thaj e bilačhe duhurja inkljistine andar o manuš thaj dine ande bale. Pe godova o sasto krdo varekaj katar duj milje bale, prastajine e bregostar ando more thaj tasadile.

14 Pe godova e manuša kaj lenas sama pe bale našline ande pašutne gava thaj pe okolne thana thaj phendine pale akava so dikhline, thaj o them avelas te dićel so sas godova. 15 Kana avile ko Isus, dikhline e manušes ande savo sas vojska benga, sar bešel furjardo ande drze thaj sar si sasto ande gođi. E dar askal dija pe lende. 16 A okola kaj lenas sama pe bale phendine lenđe sa so dogodisajlo e manušesa thaj e balenca, 17 thaj e manuša askal zamolisardine e Isuse te džaltar andar lengo krajo. 18 Kana o Isus delas ande lađica, okova manuš ande savo sas e bilačhe duhurja zamolisarda e Isuse te mućel les te džal lesa. 19 Ali o Isus či mukhla les, nego phendas lešće: "Bolde tut ćhere ke ćiri familija thaj phen lenđe so ćerda tuće o Gospod, thaj sošći bari milost dija tut." 20 O manuš đelotar thaj ačhilo te ćerel svato po Dekapolis e themešće sa so o Isus ćerda lešće. Thaj savora sas zadivime.