Marko 5

O Isus sastarel e Jairošće čhora thaj e nasvale manušnja

21 Kana o Isus palem nakhlas e lađicava pe aver rig e jezerošći, oko leste ćida pes o but them. Thaj dok sas vo još pašo jezero, 22 avilo leste jek vođa e sinagogako alavesa Jair, thaj kana dikhla e Isuse, pelo pe pešće koča angle lešće pungre e mujesa dži ke phuv 23 thaj zurale molilas les: "Mungri čhejori si po meripe. Av thaj čho ćire vas pe late, te sastol thaj te trajil." 24 O Isus đelo lesa.

A palo Isus teljardas vi okova but them, savo spidelas pe oko leste. 25 A sas okote maškar lende vi jek nasvali manušnji savi dešuduj brš patilas katar o ratvalipe. 26 But patisajli dok phirelas pe but doktorja, thaj potrošisardas sa so sas lat, ali khanči či pomognisardas laće, nego sas laće sa majgore. 27 Kana ašundas palo Isus, nakhli maškar o them thaj avili leste katar lešće dume thaj dotaknisarda lesko ogrtači, 28 kaj phendas ande peste: "Te dotaknisardem samo lešće drze, avava sasti!" 29 Thaj isto časo o ratvalipe ačhilo latar, a voj haćarda ande pesko telo kaj sastili katar piro baro nasvalipe. 30 O Isus odma haćarda kaj e sila inkljisti andar leste, thaj bolda pe ko them thaj phučlas: "Ko dirda e drze pe mande?" 31 Lešće učenikurja phendine lešće: "Dićhes kaj o them spidel pe oko tute, a tu phučes ko dirda man?" 32 Ali o Isus dićhelas oko peste te dićel ko ćerda godova. 33 A e manušnji, izdralas e daratar kaj džangla kaj sastili, avili angle leste thaj peli pe koča e mujesa dži ke phuv thaj phendas lešće sa o čačipe. 34 A vo phendas laće: "Čhorije ćiro paćipe sastarda tut. Dža ando miro thaj av sasti katar ćiro baro nasvalipe!"

35 Dok o Isus još godova motholas, avile varesave manuša andar e Jairesko ćher thaj phendine: "Ćiri čhej muli. Sostar majbut mučis e učitelje?" 36 Ali o Isus či marilas pale lenđe alava, nego phendas e Jairošće: "Na dara! Samo paća!" 37 Thaj či mukla khonikas te džal pale leste osim e Petar, e Jakove thaj e Jovane e phrale e Jakovešće. 38 Kana aresline ando ćher e sinagogaće vođasko, o Isus dikhla kaj o them rknil, rovel thaj kukil ando baro muj, 39 dija andre thaj phendas lenđe: "Sostar gaći kukin thaj roven? E čhori či muli, samo sovel." 40 A von asanas lestar. O Isus sa trada len avri, lija pesa samo e čhoraće dade, thaj laće deja thaj okole trin učenikonen kaj sas lesa, thaj dija andre okote kaj pašljolas e čhori. 41 Askal astarda e čhora palo vas thaj phendas laće: "Talita kum!" so značil: "Čhejorije, tuće phenav, ušti!" 42 E čhori odma uštili thaj ačhili te phirel (sas lat dešuduj brš) a von zaprepastisajle katar o čudo. 43 Askal o Isus zurale zapovedisarda lenđe te na mothon khonikašće pale akava, thaj phendas lenđe te den e čhora te hal.