Mateus 26

E židovske vođe planirin te mudaren e Isuse

1 Kana o Isus sas gata sa godole alavenca, phendas pire učenikonenđe: 2 "Džanen kaj si pale duj đes o prazniko e bi kvascošće mangrengo. Askal man, e Čhave e Manušešće, izdaina te čhon man po trušul."

3 Askal ćidine pe e šorvale rašaja thaj e themešće starešine ando dvoro e bare rašajesko savo akhardolas Kajafa 4 thaj dogovorisajle te astaren e Isuse po hohaipe thaj te mudaren les.

5 Thaj phendine: "Ali či tromas godova te ćeras dok si o prazniko Pasha, te či pobunil pe o them."

O Isus sas pomažime ande Vitanija

6 A o Isus sas ande Vitanija ando ćher e Simonesko e gubavcesko. 7 Dok sas pale sinija, avili dži leste varesavi manušnji e vasurjava savi sas ćerdi katar o kuč bar pherdi e kuč mirisosa savo čhordas pe Isusesko šoro.

8 Kana dikhline godova, e učenikurja holjajle thaj phendine: "Sostar kasavo rspipe! 9 Godova miris šaj kuč te bićindasas pe, a e love te den pe e čorenđe."

10 O Isus džanglas so ćeren svato thaj phendas lenđe: "Sostar zamerin akale manušnjaće? Voj ćerda manđe lačho delo. 11 Kaj e čore manušen uvek avela tumen paše tumende, a man či avela tumenca. 12 Kana čhordas akava mirisno pomast pe mande, ćerda godova pale mungro prahope. 13 Čače phenav tumenđe, kaj po sasto them propovedila pe akaja Bahtali nevimata, ćerela pe svato vi pale akava so voj ćerda, laće palo spomen."

O Juda dogovoril pe te izdail e Isuse

14 Askal jek katar e dešuduj apostolurja, akhardo Juda andar o gav Iskariot, đelo ke šorvale rašaja, 15 thaj phendas: "Kozom poćinena manđe te izdajiv tumenđe e Isuse?"

Von đinadine lešće trijanda rupune kovanice. 16 Katar askal o Juda počnisarda te rodel lačhi vrjama te izdail les.

O Isus bičhalel e učenikonen te pripremin e Pasha

17 Prvo đes kana sas o prazniko bikvascošće mangrengo e učenikurja phučline e Isuse: "Kaj kames te ćeras tuće e pashalno večera?"

18 A vo phendas lenđe: "Džan ando Jerusalim ke okova thaj okova manuš, thaj phenen lešće: ‘O učitelj phenel: Mungri vrjama si paše. Tute slaviva e pasha mungre učenikonenca.’"

19 E učenikurja ćerdine sar phendas lenđe o Isus thaj pripremisardine e pashalno večera.

20 A kana peli e rjat, o Isus sas pale sinija e dešuduje učenikonenca.

21 Dok hanas, vo phendas lenđe: "Čače phenav tumenđe, jek tumendar izdaila man."

22 Von zurale ražalostisajle thaj jek pale avreste počnisardine te phučen les: "Te naj sem možda me Gospode?"

23 A vo phendas lenđe: "Okova savo bolel o mangro manca ando čaro, godova izdaila man. 24 Vi čače me, o Čhavo e Manušesko, moraš te merav sago kaj ramol ando Sveto lil. Ali teško okolešće savo izdail man, e Čhaves e Manušešće! Majlačhe avilosas lešće te či ni bijandilosas!"

25 A lesko izdajniko o Juda phučla: "Te naj sem me godova, učiteljina?"

A o Isus phendas lešće: "Korkoro phenes."

O Isus hal e poslednjo večera e učenikonenca

26 Dok hanas, o Isus lija o mangro, zahvalisarda pale leste thaj phagla les, askal dijas pire učenikonenđe thaj phendas: "Len, thaj han! Akava si mungro telo."

27 Askal lijas o tahtaj mol, zahvalisarda e Devlešće pa dijas e učenikonenđe thaj phendas: "Pijen andar leste savora, 28 kaj akava si mungro rat, o rat savo utemeljil o savezo, thaj čhordol pe pale butende te jartonpe lenđe bezeha.