O paćipe bi e delengo si mulo
14 Savi si korist katar godova, phralalen mungralen, ako vareko phenel kaj si les paćipe, a najles dela? Šaj li kasavo paćipe te spasil les? 15 Ako varesave phrale ili pheja naj so te len pe peste ili najlen so te han svako đes, 16 a vareko tumendar phenel lenđe: "Džan ando miro, taton thaj čaljon", a či den len okova so si lenđe potrebno palo telo, savi si korist katar godova. 17 Gajda si vi o paćipe: ako si o paćipe korkoro thaj najles dela, mulo si.
18 Ali vareko phenela: "Tut si paćipe, a man si dela." Sikav manđe ćiro paćipe bi e delengo, a me sikavava tuće o paćipe mungre delenca.
19 Tu paćas kaj si samo jek Del. Godova si lačhe! Čak vi e bilačhe duhurja godova paćan thaj izdran e daratar.
20 O, nerazumne manušeja! Kames te uveris tut kaj o paćipe bi e delengo si beskorisno? 21 Či li amaro pradad o Avraam sas opravdime anglo Del pire delenca kana predajisardas pire čhaves e Isako po žrtveniko? 22 Dićhes kaj o paćipe sas jek lenđe delenca thaj kaj o paćipe e delenca postanisardas savršeno. 23 Gajda pherdilo okova so ramol ando Sveto lil: "O Avraam paćaja ando Del thaj godova đinada pe lešće sago pravednost." Thaj zato sas akhardo e Devlesko drugari. 24 Dićhen kaj o manuš opravdil pe vi e delenca, a na samo e paćimava.
25 Či li gajda vi e bludnica e Rahava opravdisajli e delenca kana primisarda e špijunen thaj inkalda len andar o gav aver dromesa? 26 Sago kaj si o telo bi e duhosko mulo, gajda si vi mulo o paćipe bi e delengo.