1 ప్రియమైలా స్నేహితులూనె, ఏ దీటో పత్రిక తొముకు ఉంచినె రాసిలించి. యే దీటో పత్రిక తొం స్వచ్చమైలా మనస్సుకు బలపర్చితే రాసించి.

2 పరిసుద్ద ప్రవక్తానె దీకిరి పూర్వకలొరె పలికిలా కొతానె, ప్రబువైలా రక్సకుడు తొం అపొస్తులునె సంగరె దిల్లా ఆజ్ఞకు తొమె గుర్తు కొరిగిమంచి బుల్లా విసయంరె తొముకు గుర్తుకొరికిరి, ప్రసాంతమైలా తొం మనుసూనుకు రేపిలించి. 3 ఆకరిదినోన్రె కుండెలింకె తంకసొంత ఆసానె తీర్చిగిత్తె కెచ్చాలి కొరిలాలింకె కెచ్చాలి కొరికుంటా తాసె. యే విసయోనె తొమె ముక్యముగా అర్దం కొరిగిల్లాపనికిరి రోండి. 4 తంకె తొం సంగరె "సెయ్యె రాకడకు గురించి కొయిలా కొత దీసి నీ నా అయిసినా కిరా? అం పూర్వికులు మొరిజీల్లా యే స్రుస్టి ఆరంబంతీకిరి సే క్రమమురె జరిగిసి బులికొయివె."

5 కైంకిబుల్నే పూర్వకలొదీకిరి మెగోఅచ్చిబులికిరి, పనిబిత్తరెదీకిరి, ఈనె పని వల్లరె సమకూర్చిలా బూమంకా పురువు కొతవల్లరె కలిగిసిబుల్లా సత్యముకు తంకె బుద్దిసంగరె పసిరిజివ్వొ. 6 ఈనె సే పనివల్లరె సెల్లెరొల్లా లోకము వరదపనిరె బుడ్డిజీకిరి నసించిజీసి. 7 ఈనె ఉంచినెరొల్లా మెగొ బూమి బక్తినీలాలింకెరొ తీర్పుకు నాసనము జరిగిలా దినొజాంక నియ్యకొరకు రొయిదీకిరి అచ్చె. సడా వాక్యమువల్లరె బద్రము కొరికిరి అచ్చె.

8 ఈనె ప్రియమైలా, స్నేహితులూనె గుటె సంగతి పసిరిజీతెనాండి. కిరబుల్నే ప్రబువు అంకికి గుటె దినొ వెయ్యి బొచ్చురొనె పనికిరి అచ్చి. వెయ్యిబొచ్చురొనె గుటె దినొపనికిరి అచ్చి.

9 కుండిలింకె ఆలస్యంబులి బచ్చిగిల్లాపనికిరి ప్రబువు తా వాగ్దానముకు గురించి ఆలస్యం కొరిలాట నీ. ఈనె కేసైనెనూ నసించిమంచెబులికిరి నాకోరిగీకుంటా, సొబ్బిలింకె మారుమనస్సు పొందిమంచెబులి కోరుగీకుంటా, తొమె ఉంపరె బడేసాంతం కలిగికిరి అచ్చి.

10 ఈనె ప్రబువు దినొ సొరొ అయిలాపనికిరి ఆసి. సే దినొరె మెగొనె మహాద్వని సంగరె గతించిజోసె. మెగొన్రెరొల్లాసొబ్బి బయంకరమైలా నియ్య సంగరె పుడ్డైజోసి, బూమంకా సడ ఉంపరె తల్లాంచల్లా పుడ్డైజోసి. 11 ఎడల్లా యాకిరి నసించిజిల్లాబెల్లె మనమ కేపాటీట. తొమె పరిసుద్దమైల ప్రవర్తన సంగరె బడే జాగర్త కలిగికిరి రొమ్మంచి. 12 ఈనె మెగొనె, పంచబూతములునె మహావెండ్రము సంగరె కడిగిజిల్లాపనికిరి, పురువు రాకడ బేగా అయిలీసిబులి కనిపెట్టుకుంట, సడకోసం జాగర్తగా ఎదురుదిగోండి. 13 ఈనెను అమె తా వాగ్దానము సంగరె నో మెగొనె కోసము నో బూమికోసం కనిపెట్టిలించొ. సడ ఉంపరె నీతి తాసి.

14 ప్రియమైలాలింకే, ఎడకోసం తొమె కనిపెట్టిలాలింకె గనక సాంతికలిగిలాపనికిరి, తా ద్రుస్టికు కలంకం నీకుంటా, నిందనీలాలింకెపనికిరి పురువు అగరె జాగర్తపొడండి. 15 ఈనె అం ప్రబువురొ సహనం తొముకు రక్సించి బులి బచ్చిగీండి. సాకిరాక అం ప్రియమైలా బయినె పౌలుకూడ తాకు దిల్లా జ్ఞానము వలరె తొముకు రాసిసి. 16 ఎడ గురించి తా పత్రికానె సొబ్బిటిబిత్తరె బోదించిలీసి. ఈనె తాండ్రొ కుండె సంగితీనె గ్రహించితె కస్టమైసి. ఎడకు నాచదువునీలాలింకు, స్దిరమునీలాలింకు తక్కిల లేకనాల్రె తప్పుగా అర్దం కొరిగిల్లాపనికిరి, తంకె తంకు సొంతంగా తప్పుగా అర్దం కొరిగీకిరి నాసనము దన్నైగిల్లీసె.

17 సడ వల్లరె ప్రియమైలాలింకే, తొమె ఏ సంగితీనె అగరాక తెలిసిగీకిరి అచ్చొ. ఈనె తొమె నీతివిరొదులురొ తప్పుబోదవల్లరె తొలిగిజీకిరి, తొముకు కలిగిలా స్తిరమనస్సుకు సడికిరి నాపొడిజీకుంటా కాచిగీకిరి టారించి.

18 ఈనె అం ప్రబువు రక్సకుడుడైలా యేసుక్రీస్తు అనుగ్రహించిలా క్రుపరె జ్ఞానంరె అబివ్రుద్ది పొందొండి. తాకు ఉంచినె కెబ్బుకూ మహిమ కలిగిమాసి.