Mateus 26

మనమానె గుంపు యేసు వ్యతిరేకంగా అయివురొ

1 సెల్లె యేసు తా బోదకు ముగించిలా తరవాతరె సిస్యునె సంగరె యాకిరి కొయిసి. 2 "దీట దినె తరవాతరె పస్కాపొరువొ అయిలబెల్లె తొముకు బుజ్జును. సెల్లె మనమరొ పోకు సిలువ పొగితె అప్పగించుసె" బులి కొయిసి.

3 ప్రదానయాజకూనె, బొడిలింకె, కయప బులి డక్కితల్లా ప్రదానయాజలుకుడురొ బవనం అగరె చేరిగిచ్చె. 4 యేసుకు తంకె కిరొ గుట్టె కుట్రసంగరె బందించికిరి మొరదిమ్మంచిబులి కాకూ మాయోపాయం కొరుసె. 5 "ఈనె పొరువొ దినొరె నాబులి, సాకిరి కొర్నే మనమాన్రె కొలీనె ఊసె" బులి బులిగిచ్చె.

బేతనియరె యేసుకు తెల్లొపొక్కిరి అబిసేకించువురొ

6 యేసు బేతనియరె కుస్టురోగైకిరి బొలైజిల్లా సీమోను గొర్రె అచ్చి. 7 యేసు కద్దికైతందుకు బొసిరికి తల్లాబెల్లె జొనె మొట్ట *26:7 ఆల్బస్టరు బుల్లా మ్రుదువైలా పొత్తొరొ సంగరె కొర్లా విలువైలా గుటె సీసాచలువరాతిబుడ్డిరె బడే కరీదైల అత్తరు సంగరె సెయ్యె పక్కరకు అయికిరి తా ముండొవుంపరె అత్తరు పొగిసి. 8 యెడ దిక్కిరి సిస్యునెకు రగొ అయిసి "కిరుకు యాకిరి వ్యర్దంకొరుసు? బులి పొచ్చిరిసె. 9 ఏ అత్తరు బడే బూతు బిక్కికిరి సే పలియ బీదలింకు దివ్వలిసిలాట" బులి తంకె కొయిసె.

10 యేసు ఏ విసయం తెలిసిగీకిరి, తంకు యాకిరి కొయిసి "తాకు కిరుకు బులిసొ? సెయ్యె మోకోసం బొల్ట పైటి కొరిసి, 11 బీదలింకె కెబ్బుకు తొంసంగరె రొసె. ఈనె మియి తొంసంగరె కెబ్బుకు తొం సంగరె తన్నిని. 12 సెల్లె యేసు సెయ్యె సే అత్తరు మో దేంపరె వోడదీకిరి మెత్తె సమాది కొరితె తయారు కొరిసి. 13 ఎడ సొత్తాక యే సువార్తకు లొకొరె కే చోటురె కొయినెను సెయ్యె గురుతుకు ఆసి. సెయ్యె కొరిలాట కూడా కొయిగుచ్చె" బులి కొయిసి.

యేసుకు అప్పకొయితె యూదా వొప్పిగివురొ

14 సె తరవాతరె పన్నెండుగురు బిత్తరె యూదా ఇస్కరియోతు ప్రదానయాజకూనె పక్కరకు జేసి. 15 "తాకు తో అప్పగించినె తొమె మెత్తె కిరదూసొ?" బులి ప్రదాన యాజకూనెకు పొచ్చిరిసి. తంకె ముపై వెండి కాసులు లెక్కకొరికిరి దీసె. 16 సెల్లిదీకిరి యూదా తాకు దరికిరి దిమంచెబులి సరైలా సమయం కోసం ఎదురు దీగిలీసి.

యేసు తా సిస్యునె సంగరె పస్కా కద్దికు కయివురొ

17 నాపులిసిల రొట్టినె కైలా పొరొవొ దినె అయిసి. సే పొర్రె తొలిదినె సిస్యునె యేసు పక్కరకు అయికిరి, పస్కాపొరువొ కద్దినె కేటె తయారు కొరుబులుసు? బులి పొచ్చిరిసె.

18 యేసు యాకిరి జవాబు కొయిసి, పట్నం బిత్తురుకు మియి కొయిల మనమ పక్కరకు జాండి తాసంగరె మో సమయం పక్కారకు అయిసి. మియి మొ సిస్యునె సంగరె మిసికిరి పస్కాపొరువొ కద్ది తొ గొర్రె కొరిమంచె బులిగిలించొ బులి అం గురువు కొయిసి బులికిరి బులి కోండి.

19 సిస్యునె యేసు కొయిలాపనికిరి పస్కాపొరువొ కద్ది సిద్దం కొరిసె.

20 సొంజయిలబెల్లె యేసు పన్నెండు లింకె సంగరె మిసికిరి కైయితందుకు బొసిరిసె. 21 సొబ్బిలింకె కైతల్లాబెల్లె యేసు తంకె సంగరె "తొంబిత్తరె జొనె మెత్తె దరిపించుసి" బులి కచ్చితంగా కొయిసి.

22 తంకు బాద కలిగికిరి ప్రతి జొనె తంసంగరె, "ప్రబూ, మీ నా" జొనె తరవాతరె జొనె పొచ్చిరిసె.

23 యేసు సమాదానం కొయికుంటా, "మోసంగరె మిసికిరి గిన్నెరె రొట్టె ముంచిలాటాక మెత్తె అప్పకొరుసి. 24 మనమరొ పో లేకనాల్రె రాసికిరితల్లాపనికి మొరుజూసి. ఈనె మనమరొపోకు అప్పకొయిలా మనమకు బడేకస్టొ కలుగుసి. సెయ్యె నాజొన్నైకిరి తన్నే బొల్ట" బులి కొయిసి

25 సెల్లె సెయ్యె ద్రోహం కొరిల యూదా, బోదకుడా "మియ్యినా" బులి పొచ్చిరిసి. యేసు, తువ్వు కొయిలాపనికిరాక బులిసి.

ప్రబు రత్తిరొ కద్ది

26 తంకె కైతల్లబెల్లె యేసు గుటె రొట్టె కడికిరి క్రుతజ్ఞతాస్తుతులు అర్పించికిరి సడకు బంగికిరి సిస్యునెకు దీకుంటా, "ఎడ కడిగీకిరి కాండి! ఎడ మో దే" బులి కొయిసి.

27 సే తరవాతరె పాత్రకు కడిగీకిరి క్రుతజ్ఞతాస్తుతులు అర్పించికిరి తంకు దీకుంటా, "సొబ్బిలింకె ఎ పాత్రరె తల్లాట పీండి. 28 యెడ మో రొగొతొ. సొబ్బిలింకు కోసం పాపక్సమాపన నిమిత్తం చిందించిలా పురువురొ నిబందన రొగొతొ.