35 క్రీస్తు ప్రేమ తీకిరి అముకు దూరు కొర్లాట కేసే? స్రమ యీనెను బాదయీనెను హింస యీనెను కరువు యీనెను కొన్న నీలాట యీనెను ఉపద్రవము యీనెను కడ్గము యీనెను అముకు దూరు యీసి కిరా?

36 "సడ కోసం లేకనాల్రె రాసిలాట కిరబుల్నే

తొ బట్టి కెబ్బుకు అమె వదించిలాలింకె

వదకు సిద్దమైలా గొర్రినె పనికిరి అముకు బచ్చిగినిసి."

37 ఈనెను అముకు ప్రేమించిలాట సంగరాక అమె ఎడ బిత్తరాక సొబ్బిటిరె గొప్ప విజయము పొందిగిల్లంచో. 38 మొర్నొ యీనెను జీవము యీనెను దేవదూతానె యీనెను ప్రదానులు యీనెను. ఉంచినె యీనెను అయివాసిబుల్లాట యీనెను అదికారినె లింకె యీనెను ఎత్తిలాట యీనెను లోతు యీలట యీనెను,

39 స్రుస్టిరె తల్లకిరయినెను యింక కిర యీనెను, అం పురువుయీల యేసుక్రీస్తు ఉంపరె పురువురొ ప్రేమదీకిరి అముకు దూరు కొరినారి బులి కచ్చితముగా నమ్మిలించో.