Luke 8

Jairus-ki machanupi amasung ee tabi nupi

40 Jisuna patki wangmada halakpa matamda miyamna mabu haraona oklammi, maramdi makhoi pumnamakna Ibungobu ngaiduna leirammi. 41 Adudagi maming Jairus kouba synagogue-ki luchingba ama laktuna Jisugi khuyada tuthajaduna mahakki yumda Ibungona lakpinaba haijarammi, 42 Maramdi mahakki chahi taranithoi surabi amata pokchabi machanupi sigadourammi.

Aduga Jisuna lambida lakpada miyam aduna Ibungogi maikei khudingmakta yomsillammi. 43 Makhoisingdugi marakta chahi taranithoi chupna ee taduna naraklabi ama yaorammi. Mahakna laiyengba mi kaya amada mahakki leijaba pumanmak puthoktuna layenglurabasu kana amatana mahakpu phahanba ngamlamde. 44 Amasung mahakna Ibungogi tungda laktuna Ibungogi phijida sokcharammi aduga khudak aduda mahakki ee taramba adu lepkhirammi. 45 Maduda Jisuna hanglak-i, "Kanana eingonda sokhibage?"”

Aduga pumnamakna sokte hairabada, Peter-na Ibungoda hairak-i, "Oja Ibungo, Mi pumnamakna Ibungoda omsinduna insinnabanani ."”

46 Adubu Jisuna hairak-i, "Kanagumba amana eibu sokkhre maramdi eingondagi panggal thokkhiba adu ei khangngi."” 47 Adudagi nupi aduna lotpa yararoi haiba khanglabada tanik tanikna laklaga Ibungogi khuyada tuthajarammi. Aduga mahakna Ibungoda kari maramgidamak sokkhiba aduga kamdouna mahakki anabadu khudaktuda phakhibage haibadu miyam adugi mangda mahakna haidokle. 48 Maduda Ibungona mangonda hairak-i, "Ichanupi, Nanggi thajabana nahakpu phahanbire; ingthana chatcharo."”

49 Jisuna wa asi hairingei matamduda synagogue-ki luchingba Jairus-ki yumdagi paopuba mi ama laktuna Jairus-ta hairak-i, "Nahakki nachanupi sire, aduna oja Ibungobu amuk wahalluraganu."”

50 Hairiba adu tabada Jisuna Jairus-ta hairak-i, "Kiganu, thada thajou aduga mahakpu soidana phahanbigani."”

51 Adudagi makhoina Jairus-ki yumda thunglabada, Jisuna Peter, John, Jacob amadi nupimacha adugi mama mapa nattana kana amatabu manungda changhallamde. 52 Aduga mi pumnamakna nupimacha adugidamak kaplammi amasung tengtha nawoirammi. Adubu Jisuna hairak-i, "Kapkanu, mahak siba natte, mahak tumlibani."”

53 Maduda makhoi pumnamakna mahak sire haiba khangbana Ibungobu noknarammi. 54 Adubu Jisuna mahakki makhuttu pairaduna houna hairak-i, "Nupimacha, hougatlu."” 55 Maduda nupimacha adugi thawaidu amuk hallaktuna mahak khudak aduda lepkhatlakle. Adudagi Jisuna nupimacha aduda chananaba karigumba khara pinanaba makhoida hairammi. 56 Amasung nupimacha adugi mama mapa adu ingak ngaklammi, adubu thokhiba thoudok adu mi kana amatada tamthoktanaba Ibungona makhoida yathang pirammi.