Mosihr niróci edde ḍoóñrgiri
1 Hétolla, Mosihr ummot ísafe tuáñra ttu honó josba tákile, muhábbot or honó tosólli tákile, Pak-Ruhr honó taalukat tákile, aar honó ador edde rahám tákile, 2 endilla gorí añr kúci fura goró: ek mon ói yore, ekí ḍóilla muhábbot rakí yore, zane ek ói yore, edde ekí kíyal rakí yore. 3 Nizor fáidar niyote yáh barík kúwalai bolla kessú no goijjó, bólke niróc ói oinno zon ore nizor túaro uttom báfiyo. 4 Siríf nizor fáida no saiyó, oinno zon or fáida yó saiyó.
5 Tuáñrar bútore e kíyal rakó ziyán Mosih Isá ttu yó accíl:
6 Íba toh Allar súrote accíl de óile yo,
Allar fúainnagiri re sibi dóri rakídito nó saá,
7 bólke Íba ye Nizoré háli gorífelail,
gulam boni,
insán ísafe zonom loi yore.
8 Íba ye insáni cokóle táki,
moot foijjonto, hoitó sailé, kúruc or uore more foijjonto fórmadar ói yore
Nizoré niróc goijjíl.
9 Hétolla bóuli toh Alla ye yó Íba re bicí uñsol tokkat tuillé,
aar Íba re nam waán diiyé ziyán hárr nam or túaro ḍoóñr,
10 zeéne Isá nam ot hárr kiyé añṛú féla,
híin asman ot tóuk yáh zobin ot, yáh zobin or nise;
11 aar hárr zobane zen Baf Allar mohíma ói bolla cíkar goré de,
Isá Mosih óilde Malik.