João 12

Jerúsalem ot Isá baáñccar ḍóilla góri góille

12 Tarfor din, ze becábicí manúc ókkol id ot aiccé, ítara fúinne de, Isá Jerúsalem ot aiyér, 13 tói ítara házu-gas or ḍaggwa ókkol looi Íba llói dola óito neeillé, aar guzori-guzori hoór de,

"Hósana!*12:13 Hibrú zuban ot Hósana maáni (meérbani góri añára re baso). Lofzó yibá taarif gorí bolla yó yián estemal goré.

Mubarek Ubá zibá Mabud or name aiyér,*12:13 Zobur 118:25,26

Becók, Íba óilde Isráili ókkol or Baáñcca!"

14 Isá ye eggwá gadár sóo fai yíbar uore boiccíl; zendilla pak-kalam ot asé,

15 "Ó Síyon or zérfua, no ḍooraiyó;

soó, tuáñr Baáñcca

gadár sóor uore boói aiyér."*12:15 Zakaríyah 9:9

16 Isár cárit tune híin age buzí nó fare; montor zeñtté Isár mohíma zahér óiye, tói ítara ttu monot uiṭṭé de, híin Íbar baabute beh leká gíyeh, aar manúc ókkole Íba re héen-héen goijjé.

17 Isá ye Lasár ore hobor ottu ḍaki mora ttu zinda goijjíl de héñtte ze manúc ókkol Íbar fúañti accíl, ítara híyan or baabute gobá díyat accíl. 18 Hétolla bóuli yó hé manúc ítara Isá llói dola óito giíl deh, kiyólla-hoilé ítara fúinnil de, hé keramot tán Íba ye beh goijjé. 19 Féroci ókkole híyan olla afós ot hoór de, "Tuáñra toh dekór, añárar honó fáida no ór. Soó, fura duniyai Íbar fisáli óigiyoi."