João 6

Fañs ázar maincóre hána hábaiye

1 Yárbaade, Isá Galil Ḍiír okule giiyégoi, ze ḍií re Tibiriyas Ḍií yó hoó. 2 Ḍoóñr ek dol manúc Íbar fisá doijjil, kiyólla-hoilé Íba ye biyaraimma ókkol or uore goittó de keramot ókkol ítara deikkíl. 3 Baade Isá eggwá faár or uore uṛí, héṛe Nizor cárit tun or fúañti boiccé. 4 Héñtte Yohúdi ókkol or Azadir-id ḍáke aiccé.

5 Isá ye suk tulí saiyé rár dekér de, ḍoóñr ek dol manúc Íbar héṛe aiyér, hétunot Íba ye Filíp ore hoór de "E manúc itará hái bolla añára ruṭi hontú kiniyúm?" 6 Filíp ore entán gorí bolla Íba ye híyan hoiyé deh, lekin Nize kii goríbo de híyan Íba ye age lóti zane.

7 Filípe Íba re zuwab diyé de, "Itará beggún ore hom-hom gori diilé yo, toóu dui cót dinár*6:7 Dinár óilde Romi koum or ṭiañr nam; ek dinár ṭiañ ek din or muzuri loi borabor. or ruṭi loi no kulaibó."

8 Íbar cárit tun ottu ezzone, yáni Sáimon Fitor or bái Enderiyase Íba re hoór de, 9 "Eṛé eggwá fua ttu fañs swá barlír*6:9 Barlí óilde giyuñr ḍóilla hodún fósol, ziín giyuñr túaro hóossa besitó. ruṭi edde duwá mas asé, montor edún maincóre iíne kii óibo?"

10 Isá ye hoór de, "Manúc cún ore buágaro." Hé zagat bicí kér accíl. Tói beṛaáin ítara boiccé, ítara tokoriban fañs ázar. 11 Tarfore Isá ye ruṭi gún looi Alla re cúkuriya goijjé, aar zetará boói accíl ítara re baṛidiyé; héndilla góri Íba ye mas óu diiyé. Ítara ttu zedún monehoiyé hédun hái faijjé.

12 Ítara beggúne feṭ bóri hái baade, Íba ye Nizor cárit tun ore hoór de, "Ze tukuṛa ókkol basigiyói híin dola gorífelo, zeéne kessú borbad no zah." 13 Tói maincé hái baade, barlír ruṭi fañsó wa ttu zedún basigiyói, híin dola gorí baró báñir bóijje.

14 Manúc cúne Isá ye goijjé de keramot tán dekí hoór de, "Sóiyi Ibá óilde Nobi Ubá zibá duniyait aibár hotá asé."