Lucas 19

Isá edde Zakéyos

1 Isá Jerikó cóor ot góli bútottu zaat accíl. 2 Héṛe Zakéyos nam or ézzon manúc accíl; yóggwa accíl házana-tulóya ókkol or sóddar edde tuangor manúc. 3 Yóggwa ye Isá hon de híyan saitó kucíc goijjíl, montor manúc or dol or zoriya saái nó fare, kiyólla-hoilé yóggwa gaafiṛé baṛí accíl. 4 Hétolla yóggwa ye Isá re sai bolla muúmmikka duñri zai eggwá ḍuñir-gas ot uiṭṭégoi, kiyólla-hoilé Íba hé foñt báy zaibo.

5 Zeñtté Isá hé zagat foóñicce, Íba ye uormikká saái yóggwa re hoór de, "Zakéyos, toratori lamogái, kiyólla-hoilé aijja Añr ttu tuáñr gór ot tákar zorur." 6 Hétunot yóggwa toratori laimmégai, aar Íba re kúcir sáañte estekbal goijjé.

7 Híyan dekí manúc beggúne endilla cékayot gorát doijje, "Íba ezzon gunágar or gorba óito giiyé."

8 Zakéyose tíyai Malik ore hoór de, "Soó Malik, añr cómbotti ttu ekdók añí gorif ókkol ore diifélair, aar zodi añí honókiyo ttu na hókkot kessú loiyí de óile, ítare añí sair gun waafes fíraidiyum."

9 Isá ye yóggwa re hoór de, "Aijja e gór ot nejat aiccé, kiyólla-hoilé yoggwá yó toh Ibrahím or fua. 10 Manúc or Fua aiccé de toh áñzigiyoi de ítara re tuwai bolla edde nejat di bolla."