Moti 14

Isá fanír uottú áñiṭṭe

22 Baade éhon or bútore Isá ye Nizor cárit tun ore mojbur goijjé de, Íba ye manúc cún ore bidai gorí dite-dite ítara zeéne noow ot uṛí Íbar age ḍiír okule zaagói. 23 Manúc cún ore bidai gorídi baade, Íba ekéla faár or uore dua goittó uiṭṭói. Aar háñz óiye de héñtte, Íba héṛe háliga, 24 montor noow gán kul ottu boóut duré, aar boiyar uzan baát accíl ísafe híyan léinge éñskar.

25 Fuáñitta, Isá fanír uottú áñṛi-áñṛi ítarar héṛe aiccé. 26 Íba fanír uottú áñṛer de híyan cárit tune dekí bicí ḍooraigiyói, aar hoór de, "Ibá bút!" Héndilla hoói, ítara ḍoore guzoran maijjíl.

27 Montor Isá ye éhon-éhon ítara re hoór de, "Hímmot goró! Ibá Añí; no ḍooraiyó."

28 Zuwabe Fitore Íba re hoór de, "Malik, zodi Tuñí de óile, añré fanír uottú Tuáñr héṛe aitó hókum dóh."

29 Íba ye hoór de, "Ai." Hétunot Fitor noow ttu lami, fanír uottú áñṛi-áñṛi Isár híkka zaat doijje. 30 Montor zeñtté tez boiyar deikké íba ḍooraigiyói, aar ḍufízargoi rár guzori hoór de, "Malik, añré baso!"

31 Isá ye toratori Nizor át barái íba re dórifelai hoór de, "Ó hom biccác ola, cóok kiyá goijjós?"

32 Baade zeñtté ítara noow ot uiṭṭégai, boiyar támaigiyoi. 33 Aar zetará noowr uore accíl ítara Íba re eén hoói sóida goijjé, "Becók, Tuñí óilade Allar Fua."