Moti 9

Sóddar or zérfua edde Isár hoor súiye de mayafua

18 Isá ye ítara re híin hoór de októt, mujilíc-hánar ézzon sóddar aái Íba re sóida gorí hoór de, "Añr zérfua wa ehón-ehón morigiyói. Montor Tuñí aái híbar uore át doogái, tói híba zinda óizayboi." 19 Hétunot Isá uṛí yóggwar fúañti zaat doijje, fúañti Íbar ummot ókkol óu giiyé.

20 Zaite-zaite eggwá baró bosór foijjonto kúnzari zár de mayafua Isár fisór ttu aái Íbar hoor or hañra súiye. 21 Kiyólla-hoilé híba ye báippil de, "Zodi añí siríf Íbar hoor súi, añí gom óizaiyumboi."

22 Isá ye fíri híba re dekí hoór de, "Ó zíi, hímmot gor! Tor imane toré gom goijjé." Tói éhon or bútore mayafua wa gom óigiyoi.

23 Isá zeñtté sóddar gwar gór ot aái bací-bazoya ókkol ore edde maincór holholani deikké, 24 Íba ye hoór de, "Tuáñra neelogói. Zérfua morigiyói de no, bólke gúm zar deh." Hétunot ítara Íba re lói áñcat doijje. 25 Montor manúc cún ore baáre neelai difélai baade, Íba bútore góli zérfua war át dóijje, tói híba uṛígiyoi. 26 Hé hóbor híyan hé elakar agagurat fóligiyoi.