9 Isá híyan ttu zaite-zaite dekér de, Moti nam or ezzon manúc házana tulé de gór ot boói táikke. Íba ye yóggwa re hoór de, "Añr fisáli doro." Hétunot yóggwa uṛí Íbar fisáli doijje.
10 Yárbaade eén óiye, Isá zeñtté Motir gór ot hána háar, boóut zon házana-tulóya edde gunágar ókkol óu aái Isá edde Íbar ummot ókkol or fúañti háito boiccé. 11 Féroci ókkole híyan dekí Íbar ummot ókkol ottu fusár gorér de, "Tuáñrar Ustate házana-tulóya ókkol or edde gunágar ókkol or fúañti kiyá hána háa?"
12 Híyan fúni Isá ye hoór de, "Araimma ókkol ottu toh ḍakṭor no lage, montor biyaraimma ókkol ottu beh lage. 13 Tuáñra zai e hotár maáni kii cíkogoi, ‘Añí kurbani saái de no, bólke rahám saái deh.’9:13 Hóciya 6:6 Kiyólla-hoilé Añí dawot dito aiccí de forhésgar ókkol ore no, bólke gunágar ókkol ore."
Ruzar baabute súwal
(Mak 2:18-22; Luk 5:33-39)