औरत और विसालकाय अजगर
1 फिर स्वर्ग मैं एक बड़ो और रहस्यमयी चिन्ह दिखाई दई। एक औरत जोको पहनावा सूरज रहै, और बाके पाँव तरे जोनी रहै, और बाके मुड़िया मैं बारह तारन को मुकुट रहै। 2 बौ जल्दिये जनम देन बारी रहै, काहैकि प्रसव को दर्द और पीड़ा बाकै रुबाए दई।
3 आसमान मैं एक और रहस्यमयी चिन्ह दिखाई दई। हूँना सात खुपड़िया और दस सींगन बारो एक बड़ो लाल अजगर रहै और बाकी हर खुपड़िया ऊपर मुकुट रहै। 4 बौ अपनी पूँछ से आसमान से एक तिहाई तारन कै खींचकै पृथ्वी मैं फेंक दई, और बौ अजगर बौ औरत के सामने ठाड़गौ, कि जब बौ बालका पैदा करै तौ बौ बालका कै निगल जाबै। 5 तभई बौ एक बेटा कै जनम दई, जो लोहे की छड़ी से सब देस की जाति के ऊपर राज्य करैगो। लेकिन बच्चा कै छीन कै परमेस्वर के सिंहासन के झोने लैजाओ गौ। 6 और बौ औरत बौ जंगल मैं भाज गई, जहाँ परमेस्वर के घाँईं से बाके ताहीं एक जघा तैयार करी गई रहै, ताकी हुँआँ बाकी देखरेख तीन साल चार महेना ले करी जाबैगी।
7 फिर स्वर्ग मैं लड़ाई छिड़ गई, मीकाईल और बाके दूत अजगर से और बाके दूतन से लड़ीं; 8 लेकिन अजगर हार गौ, और बाकै और बाके दूतन कै फिर स्वर्ग मैं रहन कि इजाजत नाय दई गई। 9 विसाल अजगर कै बाहर फेंक दौ गौ, बौ पुरानो साँप, जोको नाओं इब्लीस या सैतान रहै, जो पूरी दुनिया कै धोका दई रहै। बौ और बाके सब दूतन कै बाके संग पृथ्वी मैं फेंक दौ गौ।12:9 यूहन्ना 12:31
10 तभई मैं स्वर्ग मैं एक ऊँची अबाज सुनो, "अब परमेस्वर को उद्धार और राज्य आए गौ है! अब परमेस्वर राजा के रूप मैं अपनी सामर्थ्य दिखाई है! अब बाको मसीहा अपनो अधिकार दिखाई है! काहैकि जो हमरे परमेस्वर के सामने ठाड़ो रहै, और रात-दिन हमरे भईय्यन के ऊपर दोस लगात रहो, बाकै स्वर्ग से निकार दौ गौ।12:10 प्रकासितवाक्य 11:15 11 बौ मेम्ना के खून और सत्य की गभाई के जरिया जोको प्रचार करी रहै, बामै जय पाई; और बे अपनी ज्यान से इतनो प्रेम नाय करीं कि बे मरन कै तैयार नाय होमैं। 12 और हे स्वर्ग, और हूँना सब रहन बारेयौ खुसी मनाबौ! लेकिन पृथ्वी और समुंदर के ताहीं कितनो भयानक है! काहैकि सैतान तुम्हारे झोने उतर आओ है, और बौ गुस्सा से भरगौ है, काहैकि बौ जानथै, कि बाके पास थोड़िये समय है।"
13 जब अजगर कै पता चलो कि बाकै पृथ्वी मैं फेंक दौ गौ है, तौ बौ औरत को पीछा करनो सुरु कर दई जो बौ बालक कै जनम दई रहै। 14 बाकै रेगिस्तान मैं अपनी जघा मैं उड़न के ताहीं एक बड़े गिद्धा के दुई पंख दै गै रहै, जहाँ अजगर के हमला से बाकी साढ़े तीन साल ले देखरेख करी जागी, 15 तौ अजगर अपने मोहों से बौ औरत के पिच्छू पानी की धार बहाई, कि बौ बाकै बहाए लै जाए। 16 लेकिन पृथ्वी बौ औरत की मदत करी, बौ अपनो मोहों खोली और बौ पानी कै निगल लई जो अजगर के मोहों से निकरो रहे। 17 तौ अजगर बौ औरत के ऊपर गुस्सा भौ, और बाकी बची भइ सन्तान से लड़न कै चले गौ, जो परमेस्वर कि आग्यन कै मानथैं और ईसु की गभाई देन ताहीं वफादार है। 18 और बौ अजगर समुंदर के किनारे ठाड़गौ।