Apocalipse 13

दुई जानवर

1 तभई मैं एक जानवर कै समुंदर मैं से बाहर आत भइ देखो। बाकी दस सींग और सात खोपड़ी रहैं; बाके हर एक सींग मैं एक मुकुट रहै, और बाके हर एक खोपड़ी मैं एक नाओं रहै जो परमेस्वर की बुराई करत रहै।✝13:1 दानिय्येल 7:3; प्रकासितवाक्य 12:3 2 बौ जानवर एक तेंदुआ के हानी दिखात रहै, बाके पाँव भलुआ के तराहनी और मोहों सेरा के तराहनी रहै। और अजगर बौ जानवर कै अपनी सामर्थ्य, और सिंहासन और बड़ो अधिकार दै दई। 3 ऐसो लगत रहै कि जानवर की एक मुड़िया मैं गहरो घाव है, लेकिन घाव ठीक ही गौ रहै। पूरी पृथ्वी अचम्भित भइ और बौ जानवर के पच्छू हुई लईं। 4 सब जनी बौ अजगर की आराधना करीं, काहैकि बौ बौ जानवर कै अपनो अधिकार दई रहै। बे बहो जानवर की भी आराधना करीं, और कहीं, "जानवर के जैसी कौन है? जाके खिलाप कौन लड़ सकथै?"

5 जानवर कै गरब करन को अधिकार दौ गौ रहै जो परमेस्वर को बुराई करत रहैं, और बाकै बयालिस महेना के ताहीं अधिकार रखन की इजाजत दई गई रहै। 6 बौ परमेस्वर कै, बाके नाओं कै, बाके रहन की जघा मतलब तम्बु कै, और बे सबन कै जो स्वर्ग मैं रहत रहैं, स्राप देन लगो। 7 बाकै परमेस्वर के पवित्र लोगन के खिलाप लड़ाई करन और उन्हैं हरान की इजाजत दई गई रहै, और हर एक गोत्र, देस, भासा और जाति ऊपर अधिकार दौ गौ रहै।✝13:7 दानिय्येल 7:21 8 पृथ्वी मैं रहन बारे सब लोग बाकी आराधना करंगे, सिवाय बे लोगन के जिनके नाओं दुनिया की रचना से पहले बौ जिंदगी की किताब मैं लिखे गै रहैं, जो बौ मेम्ना को है जो घात करो गौ रहै।

9 "सुनौ, जोके पास कान होमैं बौ सुन लेबै! 10 जो भी पकड़ो जाने है बौ जरूर पकड़ो जागो; जो कोई तलवार से मारो जाने है बौ जरूर तलवार से मारो जागो। जौ परमेस्वर के पवित्र लोगन के घाँईं से धीरज और बिस्वास की माँग करथै।"

11 फिर मैं एक और जानवर देखो, जो पृथ्वी मैं से बाहर निकरो। बामै मेम्ना के जैसी दुई सींग रहैं, और बौ अजगर के हानी बोलत रहै। 12 बौ अपनी उपस्थिति मैं पहले जानवर के बड़े अधिकार को इस्तमाल करी। बौ पृथ्वी और बामै रहेन बारे सब लोगन कै बौ पहले जानवर की आराधना करन के ताहीं मजबूर करी, जोको घाव ठीक हुई गौ रहै। 13 जौ दुसरो जानवर बड़े चिन्ह चमत्कार करी; बौ सबके सामने आगी कै स्वर्ग से पृथ्वी मैं उतारी।✝13:13 1 राजा 18:24-29 14 और बौ पृथ्वी मैं रहन बारे सब लोगन कै बे चिन्ह चमत्कार के जरिया धोका दई, जिनकै पहले जानवर की उपस्थिति मैं करन की इजाजत दई गई रहै। जानवर उनकै बौ जानवर के सम्मान मैं एक मूर्ति बनान ताहीं कही जो तलवार से घायल हुई गौ रहै और फिर भी जिंदो रहै। 15 दूसरे जानवर कै पहले जानवर की मूर्ति मैं जान डारन की इजाजत दई गई, ताकी मूर्ति बात कर सकै और बे सबन कै मार डारै जो बाकी आराधना नाय करथैं।✝13:15 दानिय्येल 3:5-6 16 और बौ जानवर, छोटे और बड़े, सेठ और गरीब, आजाद और दास सब लोगन के दहने हात मैं छाप लगाए दई। 17 कि बाकै छोड़ जोके ऊपर छाप मतलब बौ जानवर को नाओं, या बाके नाओं को नम्बर होबै, और दुसरो कोई बेचनों और खरीदनों न कर सकै।

18 जाके ताहीं ग्यान की जरुरत होथै। जो बुद्धिमान है, बौ जौ जानवर के नम्बर को मतलब समझ सकथै, काहैकि नम्बर कोई के नाओं के ताहीं है। जाको नम्बर छ सौ छियासठ है।