1 चौदह साल बाद मैं बरनबास के संग यरूसलेम कै गौ, संग मैं तीतुस कै भी लैगौ। 2 मैं गौ काहैकि परमेस्वर मेरे जहन मैं बात डारी कि मोकै हूँना जाने है। अगुवन के संग एक निजी बैठक मैं गौ और सुसमाचार संदेस के बारे मैं समझाओ कि मैं गैर यहूदि के लोगन कै उपदेस देथौं। मैं न चहात रहौं कि मेरो काम बीते भै या आनबारे समय मैं बेकार जाबै। 3 मेरो जोड़ीदार तीतुस, भले हुई बौ यूनानी है, खतना करन के ताहीं मजबूर नाय करो गौ रहै, 4 हालाकि कुछ लोग बतात रहैं। संग बारे विस्वासी होन को दिखाबा करत भै, जे आदमी हमारी टोली मैं जासूस की सकल मैं सिकल आए, कि बौ आजादी जो ईसु मसीह मैं हमैं मिली है, भेद लैकै हमैं गुलाम बनामै, 5 हम एक घड़ी के ताहीं उनकी गुलामी नाय अपनाय, कि सुसमाचार कि सच्चाई तुम सबन मैं बनी रहबै।

6 लेकिन जो लोग अगुवा लगत रहैं, मैं जहे कहथौं काहैकि मोकै कोई फरक नाय पड़थै कि बे का हैं; परमेस्वर बाहरी दिखाबा से इंसाफ नाय करथै। बे अगुवन से, मैं कहथौं, मोए कोई नया सुझाव नाय दौ गौ। 7 लेकिन जाके उल्टा, बे देखीं कि परमेस्वर मोकै गैर यहूदिन मैं सुसमाचार प्रचार करन को काम दई है, जैसे पतरस कै यहूदिन के बीच सुसमाचार प्रचार करन को काम मिलो रहै। 8 परमेस्वर के सामर्थ्य से मोकै गैर यहूदियन के ताहीं प्रेरित बनाओ गौ, जैसे पतरस कै यहूदिन के ताहीं प्रेरित बनाओ गौ रहै। 9 याकूब, पतरस और यूहन्ना जो कलीसिया के खम्मा समझे जात रहैं, बे मान लईं कि परमेस्वर के अनुग्रह के जरिया मोकै जौ खास काम मोकै मिलो है; तभई बरनबास और मोसे हात मिलाईं, जौ दिखान के ताहीं कि हम सब भागीदार हैं। हम सब जामैं राजी रहैं कि बरनबास और मैं गैर यहूदि और यहूदिन के बीच मैं काम करंगे। 10 बे सब एक दुसरे से पूँछी कि हमैं उनके झुंड मैं जरूरत मंदन कै याद करनो चाहिए, जो कि मैं ऐसो करन के ताहीं भौत उताबलो हौं।

11 लेकिन जब पतरस अन्ताकिया मैं आओ, तौ मैं पूरी तरह से बाको बिरोध करो, काहैकि बौ सपा तरह से गलत रहै। 12 तभई याकूब के घाँईं से कुछ पनारे भै लोग के आन से अग्गु बौ गैर यहूदि भईय्या और बहेनियन के संग खानु खात रहै। लेकिन जब बे लोग आए, तौ बौ बापस चले गौ, और गैर यहूदियन मैं खानु नाय खाई काहैकि बौ बे लोगन से डरत रहै, जो उनको खतना करन के पक्छ मैं रहैं। 13 और यहूदि बहेनिया का भईय्या पतरस के संग गलत काम करनो सुरु कर दईं; और हिंयाँ तक कि बरनबास भी उनके संग कपट मैं पड़ गौ। 14 और जब मैं जौ देखो कि बे आदमी सुसमाचार की सच्चाई मैं नाय चल पाए रहे हैं, तौ मैं सबन के सामने पतरस से कहो, "तुम एक यहूदि हुईकै गैर यहूदि के हानी जिंदगी जी रहै हौ तौ का तुम गैर यहूदियन कै यहूदिन के तराहनी जिंदगी जीन ताहीं मजबूर कर सकथौ?"

15 सच्ची मैं, हम जनम से यहूदि हैं और "गैर यहूदि पापी," मैं से नाय, जैसो कि उनकै कहो जाथै। 16 तौभी हम जानथैं कि एक इंसान सिरफ ईसु मसीह मैं बिस्वास करन के जरिया परमेस्वर झोने धर्मी ठहराओ जागो, हमउँ ईसु मसीह के ऊपर बिस्वास करथैं कि हमरे बिस्वास के जरिया परमेस्वर के झोने धर्मी ठहराव जामैं, और नाय कि जामैं नियम की जरूरत है। काहैकि कोई भी नियम जरूरत के जरिया परमेस्वर के संग सई नाय समझो गौ है। 17 हम जो मसीह मैं धर्मी ठहराए जान की खोज कर रहे हैं, अगर खुदै पापी निकरे, तौ का मसीह पाप को सेवक है? कतईये नाय! 18 जोकै मैं एक बार खतम कर चुको हौं, अगर बाकै फिर से बनाथौं तौ खुदकै दोसी ठहराथौं। 19 मैं तौ नियम के जरिया नियम के ताहीं मर गौ, कि परमेस्वर के ताहीं जीमौं। मैं मसीह के संग क्रूस मैं चढ़ाओ गौ, 20 और अब मैं जिंदो नाय रहो, पर मसीह मेरे मैं जिंदो है और मैं सरीर मैं जो जिंदो हौं तौ सिरफ बौ बिस्वास से जिंदो हौं, जो परमेस्वर के लौड़ा मैं है, जो मोसे प्यार करी, और मेरे ताहीं अपने आपकै दै दई। 21 मैं परमेस्वर के अनुग्रह कै बेकार नाय मानथौं, काहैकि अगर नियम के जरिया धार्मिकता होती, तौ मसीह को मरनो बेकार होतो!