अपने लौड़ा के जरिये परमेस्वर को बचन
1 पुराने समय मैं परमेस्वर पुरखन से निरे दाँव और अलग-अलग तरीकन से भविस्यवक्तन के जरिया बात करी, 2 पर आखरी दिनन मैं बौ हमसे लौड़ा के जरिया बात करी है, जोकै परमेस्वर सबै चीजन को वारिस होन के ताहीं चुनी है। और बौ सब चीजन को वारिस ठहराई, बहे के जरिया बौ पूरो युग भी बनाई। 3 बौ परमेस्वर की महिमा को उजियारो और बाके तत्व की छाप है, और सब चीजन कै अपनी सामर्थ्य के बचन से सम्भालथै: बौ पापन कै धोएकै महान परमेस्वर के दहने जाए बैठो।
परमेस्वर के लौड़ा की महानता
4 लौड़ा कै स्वर्गदूतन से उतनोई महान ठहराओ गौ, जितनो बौ उनसे बड़े पद को वारिस हुईकै महान नाओं पाई। 5 काहैकि स्वर्गदूतन मैं से परमेस्वर कब कोई से कही,
"तू मेरो लौड़ा है;
आजै मैं तोकै जन्माओं हौं।"
और न ही परमेस्वर कोई स्वर्गदूत के बारे मैं जौ कही,
"मैं बाको दऊवा होंगो,
और बौ मेरो लौड़ा होगो?"
6 और जब परमेस्वर पहलोठे कै दुनिया मैं लाथै, तौ कहथै,
"परमेस्वर के सब स्वर्गदूत बाकी आराधना करैं।"
7 और स्वर्गदूतन के बारे मैं परमेस्वर जौ कहथै,
"परमेस्वर अपने स्वर्गदूतन कै आत्मा,
और अपने सेवकन कै धधकत भइ आगी बनाथै।"
8 लेकिन लौड़ा के बारे मैं परमेस्वर कहथै,
"हे धर्मी परमेस्वर, तेरो सिंहासन हमेसा रैहगो,
तेरे राज्य को राजदंड न्याय को राजदंड है।
9 तू धार्मिकता से प्रेम और अधर्म से बैर रखो;
जहे के मारे परमेस्वर, तेरो परमेस्वर,
तेरे संग बारेन से बढ़ाये कै खुसी रूपी तेल से तेरो अभिसेक करी।"
10 और जौ कि,
"हे प्रभु, सुरुवात मैं तू पृथ्वी की बुनियाद डारो,
और स्वर्ग तेरे हातन की कलाकारी है।
11 बे तौ खतम हुई जामंगे;
लेकिन तैं हमेसा रैहगो और
बे सब लत्ता के हानी पुराने हुई जामंगे।
12 और तू उनकै चद्दर के हानी लपेटैगो,
और बे लत्ता के हानी बदल जामंगे;
पर तैं बहे है
और तेरी जिंदगी कहु खतम नाय होथै।"
13 परमेस्वर अपने स्वर्गदूतन मैं से कोई से कहु भी कही होबै,
"तू मेरे दहने बैठ,
जब तक कि मैं तेरे बैरियन कै तेरे पाँव के तरे की चौकी न कर दियौं?"
14 का बे सब परमेस्वर की सेवा करन बारे स्वर्गदूत की आत्मा नाय हैं; जो उद्धार पानबारे की सेवकाई करन के ताहीं पनारे जाथैं?