1 बिस्वास रखन के ताहीं बे सब चीज होमैं जोकी हम आसा रखथैं, बे चीजन के बारे मैं जो हम नाय देख पाथैं। 2 जौ उनके बिस्वास के जरिया गभाई रहै, कि पुराने समय के लोग परमेस्वर की इच्छा से जीत रहैं। 3 बिस्वास से आपन जानथैं कि परमेस्वर के बचन के जरिया युग की रचना ऐसी करी गई जो कुछ देखन मैं आथै, बौ दिखाई देन बारी चीजन से नाय बनाओ गौ रहै। 4 बिस्वास से हाबिल परमेस्वर के ताहीं कैन से अच्छो बलिदान चढ़ाई, जोके जरिया बाके धर्मी होन की गभाई भी दई गई: काहैकि परमेस्वर बाकी भेंट के बारे मैं गभाई दई; और बहे जरिया बौ मरन के बादौ अब तक बात करथै।

5 बिस्वास से हनोक उठाओ गौ, कि मौत कै नाय देखै, और बाको पता नाय लगो; काहैकि परमेस्वर बाकै उठाए लई रहे, और बाके उठाए जान से पहले बाकी गभाई दई गई रहे, कि बौ परमेस्वर कै खुस करी है। 6 और बिस्वास बिना बाकै खुस करनो मुस्किल है, काहैकि परमेस्वर के झोने आनबारे कै बिस्वास करनो चाहिए, कि बौ है; और अपने ढूँड़न बारेन कै प्रतिफल देथै।

7 बिस्वास से नूह बे बातन के बारे मैं जो बौ समय दिखाई नाय पड़त रहैं, चितौनी पाएकै भक्ति के संग अपने परिवार के बचाव के ताहीं जहाज बनाई, और बाके जरिया परमेस्वर पूरे दुनिया कै दोसी ठहराई; और बौ धार्मिकता को बारिस भौ, जो बिस्वास से होथै।

8 बिस्वास से अब्राहम जब बुलाओ गौ तौ आग्या मानकै ऐसी जघा निकर गौ जोकै बौ अपने हक मैं लेन बारो रहे, और जौ नाय जानत रहे, कि मैं कितै जाथौं; तहुँओं निकर गौ। 9 बिस्वास से बौ वादा करे भै देस मैं परदेसी रहकै इसहाक और याकूब समेत जो बाके संग बहे वादा के वारिस रहैं, तम्बुन मैं बसेरा करी। 10 काहैकि अब्राहम बौ मजबूत बुनियाद बारे नगर को इंतजार करत रहे, जोको रचन बारो और बनानबारो परमेस्वर है।

11 बिस्वास से सारा खुद बूढ़ी होन पर भी गरब धारड़ करन की सामर्थ्य पाई; काहैकि बौ वादा करन बारे कै सच्चो जानी रहे। 12 जौ बजह से एकै जनी से जो मरो भौ सो रहे, आसमान के तारन और समुंदर किनारे के रेता के जैसी, अनगिनत बंस उत्पन्न भै।

13 जे सब बिस्वास की दसा मैं मरे; और बे वादा करी भइ चीज नाय पाईं; लेकिन उनकै दूरै से देखकै खुसी भै और मान लईं, कि हम धरती मैं परदेसी और बाहरी है। 14 जो ऐसी-ऐसी बात कहथैं, बे जाहिर करथैं, कि स्वदेस की तलास मैं है। 15 और जो देस से बे निकर आए रहैं, अगर बाके बारे मैं सोचते तौ उन्हैं लौटन को मौका रहे। 16 लेकिन बे एक उत्तम मतलब स्वर्गिय देस के अभिलासी रहैं, जहेमारे परमेस्वर उनको परमेस्वर कहबान मैं नाय सरमाथै, काहैकि बौ उनके ताहीं एक सहर तैयार करी है।

17 बिस्वास से अब्राहम, परखे जान के समय अपने इकलौते लौड़ा इसहाक कै बलिदान चढ़ान कै तैयार ही गौ रहे, जो बाके वादा कै सच मानी रहे। 18 और परमेस्वर बासे कही रहे, "इसहाक ही से तेरे झोने ऐसे बंसज होमंगे जिनकी मैं प्रतिग्या करो रहौं।" 19 काहैकि बौ मान लई, कि परमेस्वर सामर्थी है, कि बाकै मरे भयन मैं से जियाबै, जौ तरह उन्हईं मैं से कहानी की रीत मैं बौ बाकै फिर मिलो।

20 बिस्वास से इसहाक याकूब और एसाव कै आनबारी बातन के बारे मैं आसीस दई।

21 बिस्वास से याकूब मरत समय यूसुफ के दोनों लौड़न मैं से एक-एक कै आसीस दई, और छड़ी को सहारो लैकै परमेस्वर की आराधना करी।

22 बिस्वास से यूसुफ जो बौ मरन मैं रहै, तौ इस्राएल की संतान कै निकर जान की बात करी, और अपने सरीर के बारे मैं भी आग्या दई।

23 बिस्वास से मूसा के अईय्या दऊवा बाके पैदा होन के तीन महेना तक लुकाए रखाईं; काहैकि बालका सुगड़ रहे, और बे राजा की आग्या से नाय डरे।

24 बिस्वास से मूसा स्यानो हुईकै फिरौन की लौड़िया को लौड़ा होन से मना कर दई। 25 काहैकि बाकै पाप मैं थोड़ी दिन सुख भोगन से परमेस्वर के लोगन के संग दुख भोगनो औरौ अच्छो लगो। 26 और मसीह के ताहीं निन्दित होन कै मिस्र के खजाना से बड़ो धन समझी काहैकि बाकी आँखी फल पान के घाँईं लगी रहैं।

27 बिस्वास से राजा के गुस्सा से नाय डराय कै बौ मिस्र कै छोड़ दई, काहैकि बौ अनदेखे कै मानौ देखत भै मजबूत रहो। 28 बिस्वास से बौ फसह और खून छिड़कन की विधि मानी, कि पहलोठेन कै खतम करन बारो इस्राएलिन के ऊपर हाथ नाय डारै।

29 बिस्वास से बे लाल समुंदर के पार ऐसे उतर गै, जैसी सूखी धरती मैं से; और जब मिस्रिऔ बैसिये करनो चाँहीं, तौ सब डूब मरे। 30 बिस्वास से यरीहो की दीवार, जब सात दिन तक बाको चक्कर लगाए चुके तौ बौ टूट गई। 31 बिस्वास से राहाब वेस्या आग्या नाय मानन बारेन के संग खतम नाय भइ; जहे बजह से कि बौ इस्राएली भेदियन कै ठीक सांति से रखी रहे।

32 अब और का कहमौं? काहैकि समय नाय बचो है, कि गिदोन की, और बाराक की, और सिमसोन की, और यिफतह की, और दाऊद की, और समूएल की, और भविस्यवक्तन की बात करौं। 33 जे बिस्वास के जरिया राज्य जीतीं; धार्मिकता के काम करीं; वादा करी भइ चीज पाई, सेरन को मोहों बन्द करीं, 34 आगी की गर्मी कै ठंडो करी; तलवार की धार से बच निकरे, कमजोरी मैं तगड़े भै; लड़ाई मैं ताकतबर निकरे; विदेसी सिपईय्यन के डेरा कै मार भजाईं।

35 बईंय्यरैं अपने मरे भैन कै फिर जिंदो पाईं; कितने तौ मार खात-खात मर गै; और छुटकारा नाय चाँहीं; काहैकि अच्छी जिंदगी कै पानबारे बनै। 36 दूसरे लोग तौ मजाक मैं उड़ाए जान; और कोड़ा खान; बल्कि भाँदे जान; और कैद मैं पड़न के जरिया परखे गै। 37 पथरा से मारे गै; आरे से चीरे गै; उनकी परिक्छा करी गई; तलवार से मारे गै; बे कंगाली मैं और कलेस मैं और दुख भुगतत भै भेंड़न और बकरियन की खाल ओढ़े भै, इतै-उतै मारे-मारे फिरैं। 38 और जंगलन, पहाड़न, गुफन, और धरती की दरारन मैं भटकत फिरे।

39 दुनिया उनके लायक नाय रहै और बिस्वास के जरिया जे सबन के बारेन मैं अच्छी गभाई दई गई! तहुँओं उनकै बौ चीज नाय मिली जोकी परमेस्वर उनसे वादा करी रहे। 40 काहैकि परमेस्वर हमरे ताहीं पहले से एक अच्छी योजना बनाई रहे। बाको मकसद रहे कि बौ हमरे संग मिलकै उनकै और सिद्ध बनाबै।