1 जहेमारे जो सच्चाई हम सुने हैं, कि हम बे बातन मैं जाधे ध्यान दियैं, ऐसो न होबै कि बहक कै उनसे दूर चले जामैं। 2 काहैकि जो बचन स्वर्गदूतन के जरिया कहो गौ रहे, जब बौ टिको रहो और हर एक गलत काम और आग्या न मानन को सई-सई बदला मिलो जोके बे लायक हैं। 3 तौ आपन सब जनी ऐसे बड़े उद्धार से बिना खटके कैसे रह सकथैं? जोकी बातचीत पहले-पहलान प्रभु के जरिया भइ, और सुनन बारेन के जरिया हमकै बिस्वास भौ। 4 और संगै परमेस्वर भी अपनी इच्छा के अनुसार चिन्ह चमत्कार के अचम्मे काम, निरे तरह के सामर्थ्य के काम और पवित्र आत्मा के वरदानन कै बाँटन के जरिया जाकी गभाई देत रहो।

5 परमेस्वर, बौ आनबारी दुनिया कै जोकी बात हम कर रै हैं, स्वर्गदूतन के हात न करी। 6 जाके बजाय जैसो की सास्त्र मैं कहूँ पर कहो गौ है,

"इंसान का है, कि तू बाकी खबर लेथै?

या इंसान को लौड़ा का है, कि तू बाके ऊपर नजर करथै?

7 तू बाकै स्वर्गदूतन से थोड़िये कम करो;

तू बाके ऊपर महिमा और आदर को मुकुट रखो और बाकै अपने हातन के कामन मैं अधिकार दौ।

8 तू सब कछु बाके पाँए तरे कर दौ।"

जहेमारे जब कि बौ सब कछु बाके अधीन कर दई, तौ बौ कुछ भी न रख छोड़ी, जो बाके अधीन न है। पर हम अब तक सब कछु बाके अधीन नाय देखथैं। 9 पर हम ईसु कै जो स्वर्गदूतन से थोड़िये कम करो गौ है, मौत को दुख उठान के बजह से महिमा और आदर को मुकुट पहने भै देखथैं; ताकी परमेस्वर के अनुग्रह से बौ हर एक इंसान के ताहीं मौत को स्वाद चखै। 10 काहैकि जोके ताहीं सब कछु है, और जोके जरिया सब कछु है, बाकै जहे अच्छो लगो कि जब बौ भौत से लौड़न कै महिमा मैं पहोंचाबै, तौ उनके उद्धार करन बारे कै दुख उठान के जरिये सिद्ध करै। 11 काहैकि पवित्र करन बारो और जो पवित्र करे जाथैं, सब एकै मूल से है, मतलब परमेस्वर, जहे के मारे ईसु उनकै भईय्या कहेन से नाय सरमाथै। 12 लेकिन बौ परमेस्वर से कहथै,

"मैं तेरो नाओं अपने भईय्यन कै सुनांगो,

मैं सभा के बीच मैं तेरो गाना गामंगो।"

13 बौ जहो कहथै,

"मैं बाके ऊपर भरोसा रखंगो।"

और बौ जहो कहथै,

"देख, मैं बे बालकन के संग हौं जोकै परमेस्वर मोकै दई है।"

14 जहेमारे जब कि बालका मास और खून के भागीदार हैं, तौ ईसु खुद भी उनके तरह उनको सहभागी हुई गौ; ताकी मौत के जरिया बाकै जोकै मौत ऊपर सक्ति मिली रहै, मतलब सैतान कै निकम्मो कर देबै, 15 और जितने मौत के डर के मारे जिंदगी भर दास बने भै रहे, उनकै छुड़ाय लेबै। 16 काहैकि बौ तौ स्वर्गदूतन कै नाय बल्कि अब्राहम के बंस कै संभालथै। 17 जहेमारे बाकै जरूरी रहै, कि सब बातन मैं अपने भईय्या-बहेनियन के जैसे बनै; जोसे बौ बे बातन मैं जो परमेस्वर से जुड़ी भइ है, एक दयालु और बिस्वास के लायक बड़ो पुजारी बनै ताकी लोगन के पापन के ताहीं पछताबै। 18 काहैकि जब बौ परिक्छा की घड़ी मैं भी दुख उठाई, तौ बौ उनकी भी मदत कर सकथै, जिनकी परिक्छा होथै।