1 तभई जबकी बाके विसराम मैं घुसन को वादा अब तक है, तौ हमकै डरनो चाहिए; ऐसो नाय होबै, कि तुम मैं से कोई आदमी बासे अलग रह जामैं। 2 काहैकि हमैं उन्हईं के जैसी सुसमाचार सुनाओ गौ है, लेकिन सुने भै बचन से उनकै कछु फायदा न भौ; काहैकि सुनन बारेन के मन मैं बिस्वास के संग नाय बैठो। 3 और हम जितने बिस्वास करे हैं, बौ आराम कै पाथैं;

जैसो बौ कही, "मैं अपने गुस्सा मैं कसम खाओ,

कि बे मेरे आराम मैं घुस नाय पांगे।"

बे जहो कहीं कि दुनिया की उत्पत्ति के समय से बाके काम हुई चुके हैं। 4 काहैकि सातवें दिन के बारे मैं बौ कहूँ पर ऐसो कही है, "परमेस्वर सातवें दिन अपने सब कामन कै निपटाए कै आराम करी।"

5 और जौ जघा फिर ऐसो कहथै,

"बे मेरे आराम मैं घुस नाय पांगे।"

6 तौ जब जौ बात बाकी है कि कितने और हैं जो बौ आराम मैं घुसैं, और इस्राएलिन कै, जिनकै बाको सुसमाचार पहले सुनाओ गौ, बे आग्या न मानन के बजह से बामै घुस नाय पाईं। 7 तभई परमेस्वर एक दिन मतलब "आज को दिन" ठहराएकै दाऊद की किताब मैं, जैसो कहो गौ है,

"अगर आज को दिन बाको सब्द सुनौ,

तौ अपने मन कै कठोर मत करौ।"

8 अगर यहोसू उनकै आराम करन बारी जघा मैं लै जातो, तौ दुसरे दिन की कोई बातचीत न होती। 9 तभईये जान लियौ कि परमेस्वर के लोगन ताहीं साबत को दिन बाकी है। 10 जो कोई भी बाके विसराम मैं गौ है, बौ भी परमेस्वर के अग्गु अपने काम कै पूरो करकै विसराम करी है। 11 जहे ताहीं हम बौ विसराम मैं घुसन के ताहीं कोसिस करैं, ऐसो न होबै, कि कोई उनके हानी आग्या न मानकै गिरै।

12 परमेस्वर को बचन जिंदो, मजबूत, और दुईधारी तलवार जो प्राँड़, आत्मा, गाँठी-गाँठी और गूदा-गूदा कै अलग करकै सबै तरहन से काटथै, और जहाँ मन, आत्मा मिलथै बौ मन की इच्छा और बिचारन कै जाँचन मैं सक्छम है। 13 ऐसो कुछ भी न है जो परमेस्वर से छिपाओ जाए सकथै; पूरी दुनिया मैं सब कुछ उजागर है, और बाकी आँखी के अग्गु सबै चीज खुली हैं। और जौ बहे के ताहीं है जो हमैं सबन कै अपनो-अपनो हिसाब देने है।

14 तौ हम बौ बिस्वास कै मजबूत से पकड़थैं जोकै हम मानथैं। काहैकि हमरे झोने एक महान बड़ो पुजारी है जो परमेस्वर के झोने स्वर्ग मैं गौ है, परमेस्वर को लौड़ा ईसु। 15 हमरो महान बड़ो पुजारी बौ ना है जो हमारी कमजोरी मैं सहानुभूति महसूस कर पाबै। इनकी जघा मैं हमरे झोने एक महान बड़ो पुजारी है, जोकी हर तरहन से परिक्छा भइ लेकिन बौ पाप नाय करी। 16 तभई आबौ, हम अनुग्रह के सिंहासन के झोने हिम्मत भाँदकै चलैं, कि हमरे ऊपर दया होबै, और बौ अनुग्रह पामैं, जो जरूरत के समय हमरी मदत करै।