1 सबसे सुरू मैं बचन रहै, और बचन परमेस्वर के संग रहै, और सब्दै परमेस्वर रहै। 2 और जहे सुरू मैं परमेस्वर के संग रहै। 3 सबै कछु बाके जरिये पैदा भौ, और जो कछुए बनो है, बामै से कछु चीज बाके बिना पैदा नाय भौ है। 4 बहे मैं जिंदगी रहै और बहे जिंदगी दुनिया के इंसानन ताहीं उजियारो रहै। 5 जोती अंधियारे मैं चमकथै, और अंधियारो बाके ना अपनाईं।

6 परमेस्वर को भेजो भौ एक आदमी आओ, बाको नाओं यूहन्ना रहै। 7 बौ गभाई देन आओ कि बौ सब जनी कै जोती के बारे मैं बताबै, ताकी सब इंसान बाके जरिये बिस्वास करैं। 8 बौ खुद जोती नाय रहै, पर बौ जोती की गभाई देन कै आओ रहै। 9 सच्ची जोती सब जनी कै उजीतो देथै, जौ दुनिया मैं आनबारी रहै।

10 बौ जौ दुनिया मैं रहै, और पूरी दुनिया बाके जरिये बनाई गई, और दुनिया बारे बाकै नाय पहचानी। 11 बौ अपनेन के झोने आओ, और अपने बाकै नाय अपनाईं। 12 लेकिन जित्ते जनी अपनाईं, बौ उनकै परमेस्वर को बालका होन को अधिकार दई, यानी बे जो बाके नाओं मैं बिस्वास रखथै। 13 बे ना तौ खून से, और ना तौ सरीर की इच्छा से, और ना तौ इंसानन की मरजी से, पर बे तौ परमेस्वर से पैदा भै है।

14 और बौ बचन इंसान को सरीर रूप लैकै, हमरे बीच मैं डेरा धरी, और हम बाकी ऐसी महिमा देखे, जैसे परम दऊवा परमेस्वर के इकलौते बेटा की महिमा, जो दया और सच्चाई से भरो हे।

15 यूहन्ना बाके बारे मैं गभाई दई, और पुकारकै कही, "जौ बहे है जोके बारे मैं जिकर करो रहों, कि जो मेरे बाद आए रौ है, बहे मोसे बड़ो है, काहैकि बौ मोसे पहले को रहै।"

16 बाकी दया और सच्चाई कै पूरी तरह से हम सब जनी पाए हैं मतलब अनुग्रह मैं अनुग्रह। 17 जहे ताहीं की नियम तौ मूसा के जरिये दौ गौ है, लेकिन अनुग्रह और सच्चाई ईसु मसीह के जरिये हमरे झोने पुगी हैं। 18 जो खुद परमेस्वर है और परम दऊवा के संग है, परमेस्वर उनकै दिखाई है।

19 यूहन्ना की गभाई जौ है कि, जब यहूदि यरूसलेम से पुजारी और लेवीयन कै बासे जौ पूँछन के ताहीं भेजीं, "कि तैं कौन है?"

20 तौ यूहन्ना मान लई, और मना नाय करी, और कही "मैं मसीह ना हौं।"

21 तौ बे बासे पूँछीं, "तौ फिर तैं कौन है? का तैं एलिय्याह भविस्यवक्ता है?"

यूहन्ना कही, "मैं नाय हौं।"

"का तैं बौ भविस्यवक्ता है?" बौ जबाब दई, "ना।"

22 तौ बे बासे पूँछीं, "फिर तैं है कौन? ताकी हम अपने भेजन बारेन कै जबाब देमैं। तैं अपने बारे मैं का कहथै?"

23 यूहन्ना कही, "जैसो यसायाह भविस्यवक्ता कही है,

‘मैं रेगिस्तान मैं एक बुलान बारे की अबाज हौं,

कि तुम प्रभु की रहा सीधी करौ!’"

24 बे फरीसियन के घाँईं से भिजबाए गै खबर लेन बारे रहैं। 25 बे यूहन्ना से जौ पूँछीं, "कि अगर तैं मसीह नाय है, और ना तैं एलिय्याह है, और न तैं भविस्यवक्ता है, तौ फिर तैं बपतिस्मा काहे देथै?"

26 यूहन्ना बाकै जबाब दई, "मैं तौ पानी से बपतिस्मा देथौं, लेकिन एक आदमी तुमरे बीच मैं ठाड़ो है, जोकै तुम नाय जानथौ। 27 मतलब कि जो मेरे बाद आनबारो है, बाकी मैं जूता कि तनी खोलनौ के लायक ना हौं।"

28 जे बातैं यरदन नदिया के बौ पाँजर बैतनिय्याह मैं भईं, जहाँ पर यूहन्ना बपतिस्मा देत रहै।

29 दुसरे दिन यूहन्ना ईसु कै अपने घाँईं आत भौ देखी, और कही "देखौ, जौ परमेस्वर को मेम्ना है और जौ दुनिया के पापन कै दूर करथै। 30 जौ बहे है जोके बारे मैं, मैं कहो रहों, ‘एक आदमी मेरे पच्छू आए रौ है जो महुँ से महान है, काहैकि बौ मोसे पहले रहै।’ 31 मैं तौ बाकै जानतै नाय रहों, पर मैं जहे ताहीं पानी से बपतिस्मा देत आओ हौं ताकी इस्राएल के आदमी बाकै जान लेमैं।"

32 और यूहन्ना जौ गभाई दई, "मैं पवित्र आत्मा कै कबूतर के भेस मैं आसमान से उतरत भौ देखो, और पवित्र आत्मा कै बाके ऊपर बैठत भइ देखो। 33 मैं तौ बाकै जानतै ना रहों, पर जो मोकै पानी से बपतिस्मा देन ताहीं भेजी रहै, बहे मोसे कही रहै, कि जोके ऊपर तैं पवित्र आत्मा कै उतरत भइ और बाके ऊपर ठैहरथ भइ देखै, बहे पवित्र आत्मा से बपतिस्मा देन बारो है। 34 यूहन्ना कही, मैं देखो हौं, गभाई दौ हौं कि जहे परमेस्वर को लौड़ा है।"

35 दुसरे दिन यूहन्ना और बाके दुई चेला ठाड़े रहैं। 36 और यूहन्ना ईसु कै, झोने आत भइ देखकै कही, "देखौ, जौ परमेस्वर को मेम्ना है।"

37 तौ बे दोनों चेला यूहन्ना की जे बात सुनकै ईसु के पच्छू चल दईं। 38 ईसु मुड़कै उनकै पच्छू आत भौ देखी और उनसे कही, "तुम कौनकै ढूँड़ रै हौ?" बे ईसु कै जबाब दईं, "गुरुजी, तैं कहाँ पर रहथै?"

39 ईसु उनसे कही, "आबौ, और देखौ।" तौ बे जाएकै ईसु की रहन बारी जघा कै देखीं, और बौ दिन ईसु के संग रहीं। काहैकि लमसम संजा के चार बज चुके रहैं।

40 बे दोनों मैं से, जो यूहन्ना की बात सुनकै ईसु के पच्छू हुई लईं रहैं, उनमैं से एक सिमौन पतरस को भईय्या अन्द्रियास रहै। 41 बौ पहले अपने सगे भईय्या सिमौन से मिलकै बासे कही, "हमकै मसीह मिलगौ है।"

42 बौ बाकै ईसु के झोने लाई, ईसु बाके घाँईं देखकै कही, "तैं यूहन्ना को लौड़ा पतरस सिमौन है, तैं कैफा मतलब पतरस कहो जागो।"

43 दुसरे दिन ईसु गलील कै जान की सोची, बौ फिलिप्पुस से मिलकै कही, "मेरे हुई ले।" 44 फिलिप्पुस, अन्द्रियास और पतरस बैतसैदा सहर के रहन बारे रहैं। 45 फिलिप्पुस, नतनएल से मिलो और बासे कही, "जो की बात मूसा और भविस्यवक्ता नियम मैं करी है, बौ यूसुफ को लौड़ा, नासरत को ईसु है।"

46 नतनएल बासे कही, "कछु अच्छी चीजौ नासरत से निकर सकथै का?"

फिलिप्पुस बासे कही, "चलकै देखले।"

47 ईसु नतनएल कै अपने घाँईं आत भौ देखकै कही, "देखौ, जौ सच्ची मैं इस्राएली है, जाके भीतर कपट नाय है?"

48 नतनएल ईसु से कही, "तैं मोकै कैसे जानथै?" ईसु बाकै जबाब दई, "फिलिप्पुस के बुलान से पहले, तैं अंजीर के रूखा के तरे रहै, तहिये मैं तोकै देखो रहों।"

49 नतनएल फिर ईसु से कही, "गुरुजी, तैं परमेस्वर को लौड़ा है, तैं इस्राएल को राजा है।"

50 ईसु बाकै जबाब दई, "मैं तोसे कहो हौं, कि मैं तोकै अंजीर के रूखा के तरे देखो, का तैं तभई बिस्वास करथै तैं जहो से बड़े-बड़े काम देखैगो।" 51 फिर बासे कही, "मैं तुमसे सच्ची-सच्ची कहथौं कि तुम आसमान कै खुलो भौ, और परमेस्वर के स्वर्गदूतन कै आदमी के लौड़ा के ऊपर उतरत और ऊपर जात भौ देखैगे।"