33 जब बे खोपड़ी नाओं कि जघा मैं पौहोंचे, तौ बे हुँआँ ईसु कै क्रूस मैं चढ़ाईं, और बे दोनों अपराधिन कै भी, एक ईसु के दहने और दुसरो ईसु के बाँए घाँईं। 34 तौ ईसु कही, "दऊवा! इनकै माफ कर दे, काहैकि जे ना जानथैं कि जे का कर रै हैं।" बे पासा डारकै बाके लत्ता आपस मैं बाँट लईं। 35 यहूदि अधिकारी बाके ऊपर झपटत भइ हुँआँ ठाड़े भै लोगन कै देखत रहैं: और कहीं, "बौ दुसरेन कै बचाई है; अगर बौ मसीहा है जोकै परमेस्वर चुनी है तौ अपने आपकै बचाए ले!"
36 सिपईय्या ईसु को मजाक बनाईं: बे बाके झोने आए और बाकै घटिया दाखरस पीन कै दई, 37 और कहीं, "अगर तैं यहूदियन को राजा है तौ अपने आपकै बचाए ले!"
38 ईसु के ऊपर जे सब्द लिखे गै रहैं: कि "जौ यहूदियन को राजा है।"
39 हुँआँ लटके भै अपराधिन मैं से एक जनी बाकी बुराई करीं: "का तैं मसीहा ना है? अपने आपकै और हमकै बचा!"
40 लेकिन दुसरो जनी बाकै झुकात भै कही, "का तैं परमेस्वर के न्याय से ना डराथै? तहूँ तौ बहे सजा पाए रौ है। 41 हमरो, खाली ठीक है, काहैकि हमैं बहे मिल रौ है जोके हम सई रूप मैं हकदार हैं, जो हम करे; लेकिन बौ कोई गलत काम ना करी।" 42 और बौ ईसु से कही, "ईसु, जब तैं अपने राज्य मैं राजा के रूप मैं आबै, तौ मोकै याद करीये!"
43 ईसु बासे कही, "मैं तोसे सच्ची मैं कहथौं कि आज तैं मेरे संग स्वर्गलोक मैं होगो।"
ईसु कि मौत
(मत्ती 27:45-56; मरकुस 15:33-41; यूहन्ना 19:28-30)