1 फिर ईसु हूँना से उठकै यहूदिया की सीमा से यरदन नदिया के पार आओ। लोगन की भीड़ फिर से बाके झोने आई और बौ हमेसा तराहनी सिखान लागो।

2 तौ फरीसी बाके झोने आए कै बाकै फसान की कोसिस करीं। "बे ईसु से पूँछीं," हमकै बता, "का हमरो नियम एक आदमी कै बाकी अपनी बईय्यर कै छोड़न को अधिकार देथै?"

3 तौ बौ उनकै जबाब दई। "मूसा तोकै का नियम दई है?"

4 बे कहीं "मूसा अपनी बईय्यर कै नियम के जरिया एक चिट्ठी लिखकै छोड़न ताहीं इजाजत दई है।"

5 ईसु उनसे कही, "तुमरे कर्‌रे मन की बजह से जौ आग्या बौ तुमरे ताहीं लिखी। 6 सास्त्र ऐसो कहथै, जौ दुनिया की सुरुवात से परमेस्वर लोग और बईय्यर करकै उनकै बनाई है। 7 तौ जहे बजह से आदमी अपनी अईय्या और दऊवा से अलग हुईकै अपनी बईय्यर के संग रहागो, 8 तौ बे दोनों एक तन हीकै एक संग रहमंगे; काहैकि अब बे दुई नाय बल्किन एक सरीर हैं। 9 काहैकि जोकै परमेस्वर जोड़ी है, उनकै आदमी अलग नाय करै।"

10 घर मैं आयकै चेला जाके बारे मैं बासे फिर पूँछीं। 11 बौ उनसे कही, "एक आदमी अपनी बईय्यर कै तलाक दैकै दुसरी से बिहा करथै तौ बौ पहली बारी के खिलाप व्यभिचार करथै; 12 जहे हानी अगर बईय्यर अपने लोगा कै तलाक दैकै दुसरे लोग से बिहा करथै तौ बौ भी व्यभिचार करथै।"

13 फिर लोग बालकन कै ईसु के झोने लान लगे की बौ उनके ऊपर हाथ धरै, तौ बाके चेला उनकै झुकाईं। 14 ईसु जौ देखकै गुस्सा हुईकै चेलन से कही, "बालकन कै मेरे झोने आनदेयौ उनकै रोकौ मत्ती, काहैकि परमेस्वर को राज्य ऐसियनै को है। 15 मैं तोसे सच्ची कहथौं कि जो कोई परमेस्वर के राज्य कै बालकन जैसी नाय मानैगो, बौ परमेस्वर के राज्य मैं कहुए नाय पुगैगो।" 16 फिरौंकी बौ बालकन कै गोदी मैं लई, और उनके ऊपर हाथ धरकै आर्सिवाद दई।

17 ईसु हुँआँ से निकरकै रहामैं जातै रहै, तौ एक आदमी भाजत भौ बाके झोने आओ, और बाके अग्गु घूँटे टेक कै बासे पूँछी, "अच्छो गुरुजी, अनंत जिंदगी पान ताहीं मैं का करौं?"

18 ईसु बासे कही, "तू मोकै अच्छो काहे मानथै? कोई अच्छो नाय है, खाली परमेस्वर है। 19 तू आग्यन कै जानतै होगो: ‘हत्या मत करिये, व्यभिचार मत करिये, चोरी मत करिये, झूठी गभाई मत दिए, ठगिये मत्ती, अपने दऊवा और अईय्या को कहनो मानिये।’"

20 बौ बासे कही, "गुरुजी, इन सबन कै मैं बचपन से मानत आओ हौं।"

21 ईसु बाकै प्यार से देखकै बासे कही, "तेरे मैं एक बात की कमी है। जा, जो कछु तेरो है बाकै बेंच कै कंगालन कै दैदे, और तोकै स्वर्ग मैं धन मिलैगो, और मेरे पच्छू हुई ले।" 22 और जौ बात से बाको मोहों पुस्केयाए गौ, बौ दुखी हुईकै चले गौ, काहैकि बौ बड़ा सेठ रहै।

23 ईसु सब घाँईं देखी और अपने चेलन से कही, "सेठ आदमी को परमेस्वर के राज्य मैं आनो बड़ा मुस्किल है।"

24 चेला बाकी बात से अचम्मे भै। और फिर ईसु उनसे कही, "अरे बालकौ, जो धन के ऊपर भरोसो रखथै, उनको परमेस्वर के राज्य मैं जानो बड़ा मुस्किल है! 25 सुईं के भार से ऊँट कै निकर जानो तौ आसान है पर परमेस्वर के राज्य मैं सेठ आदमी को घुसनों कतई मुस्किल है।"

26 चेला बड़ा अचम्मे हुईकै आपस मैं कहेन लगे, "तौ फिर कौन, बचाओ जाओ सकथै?"

27 ईसु उनके घाँईं देखकै कही, "आदमिन से तौ जौ नाय हुई सकथै, लेकिन परमेस्वर से हुई सकथै; काहैकि परमेस्वर से सब कछु हुई सकथै।" 28 पतरस उनसे कहेन लागो, "देख हम तौ सब कछु छोड़कै तेरे पच्छू हुई लै हैं।" 29 ईसु कही, "मैं तुमसे सच्ची कहथौं कि ऐसो कोई नाय है जो मेरे सुसमाचार के ताहीं घर या भईय्यन या बहेनियन या अईय्या-दऊवा या बाले-बच्चन या खेतन कै छोड़ दई होबै, 30 बौ अब जौ समय खूबै पाबैगो। बौ सौ गुना अगरो घर, भईय्यन, बहेनियन, अईय्या, बाल-बच्चन, खेतन, सताव, और दुसरे युग मैं अनंत जिंदगी पाबैगो। 31 पर बे जो बड़ा जोड़ जनी पहले से हैं, पच्छू होमंगे; और जो पच्छू हैं, बे अग्गु होमंगे।"सहर की दीवार और फाटक के बाहर बेचन बारो ऊँट कै दिखात भइ

32 बे यरूसलेम कै जात भै रहामैं रहैं, और उनके अग्गु-अग्गु ईसु जात रहै: चेला अचम्मे होन लागे। बे जो बाके पच्छू-पच्छू आत रहैं बे डरात रहैं। तौ बौ फिरौंकी बारहों कै लैकै उनसे कहेन लागो, जो बाके ऊपर आनबारी रहै, 33 "देखौ हम यरूसलेम कै जानथैं, इंसान को लौड़ा कै पकड़वाए कै मुखिया पुजारिन और यहूदि नियम के सिक्छकन के हाथ मैं दै दौ जागो, और बे बाकै मारन ताहीं बाकी बुराई करंगे, और गैर यहूदि कै दै देंगे। 34 बे बाकी मजाक बनांगे, और बाके ऊपर थूकंगे, बाकै कोड़ा मारंगे और बाकै मार डारंगे और बौ तीन दिन बाद जिंदो हुई जागो।"

35 तौ जब्दी को लौड़ा याकूब और यूहन्ना बाके झोने आए कै कहीं, "गुरुजी, जो कुछ हम तोसे माँगै बौ तू हमरे ताहीं करै।"

36 बौ उनसे कही, "तुम का चाहथौ?"

37 तौ बे बासे कहीं, "हमैं जौ दे कि तेरे राज्य के सिंघासन की महिमा मैं जब तैं बैठैगो तौ हममैं से एक तेरे दाँए और दुसरो तेरे बाँए बैठै।"

38 ईसु उनसे कही, "तुम नाय जानथौ की तुम का माँग रै हौ? जो कटोरा मैं, मैं पीन बारो हौं, का तुम पी सकथौ? और जो बपतिस्मा मैं लेन बारो हौं, का तुम लै सकथौ?"✝

39 बे बासे कहीं, "हमसे हुई सकथै।" ईसु उनसे कही, "जो कटोरा मैं पीन बारो हौं, तुम पीबैगे; और जो बपतिस्मा मैं लेन बारो हौं, बाकै लेगे। 40 पर जौ अधिकार मेरो नाय है और दाँए-बाँए बैठारन को मेरो काम नाय है। जोके ताहीं जघा समारो गौ है, उनकै परमेस्वर खुद बैठारैगो।"

41 जौ सुनकै बे दसौ चेला याकूब और यूहन्ना से खिसियान लगे। 42 तौ ईसु उनकै झोने बुलाएकै उनसे कही, "तुम जानथौ की गैर यहूदि के हाकिम माने जाथैं; और बे उनके ऊपर राज्य करत रहैं; और उनमैं जो बड़ो है, उनके ऊपर अधिकार दिखात रहै। 43 पर तेरे मैं ऐसो न है, जो कोई तुम मैं से बड़ो होनो चाहथै बौ तुमरी सेवा करन बारो सेवक बनै; 44 और जो कोई तुम मैं से मुखिया बननो चाहबै सबको दास बनै। 45 इंसान को लौड़ा जाके ताहीं नाय आओ है कि बाकी सेवा करी जाबै, बल्कि जाके ताहीं आओ कि बौ खुद सेवा करै, और दुसरेन कै छुड़ान ताहीं अपनी ज्यान देबै।"

46 ईसु और बाके चेला यरीहो मैं आए, और बे एक बड़ी भीड़ संग यरीहो से निकरत रहैं, तौ तिमाही को लौड़ा बरतिमाई, एक अंधरा भिकमंगा रस्ता टिकारे बैठो रहै। 47 बौ जौ सुनकै की ईसु नासरी है, तौ चिल्लाए-चिल्लाए कै कहेन लगो, "दाऊद को लौड़ा, ईसु मेरे ऊपर दया कर।"

48 सबै जनी बाकै झुकाइ की चुप्पा रहा, बौ और चिल्लान लागो, "ए दाऊद को लौड़ा, मेरे ऊपर दया कर।"

49 तौ ईसु रुक कै कही, "बाकै बुलाबौ।" और बे आदमी अंधरा कै बुलाएकै बासे कहीं, "हिम्मत भाँद! उठ! बौ तोकै बुलाए रौ है।"

50 बौ अपनो लत्ता खेंक कै तुरंत उठो, और ईसु के झोने आओ।

51 तौ फिर ईसु बासे कही, "तू का चाहथै कि मैं तेरे ताहीं करौं?" अंधरा बासे कही, "गुरु, मैं फिर से देखन लगौं।"

52 ईसु बासे कही, "चले जा, तेरो बिस्वास तोकै अच्छो करी है।" बौ तुरंत देखन लगो, और रस्ता मैं बाके पच्छू हुई लई।