1 भोर होतै खिना मुखिया पुजारी, खास बड़े-बूढ़े, यहूदि नियम के सिक्छकन, और पूरी सभा आपस मैं फैसला करीं और ईसु कै बंधबाए कै पिलातुस के हात मैं सौंप दईं।

2 पिलातुस बासे पूँछी, "का तू यहूदिन को राजा है?" ईसु जबाब दई, "तू खुदै बताए रौ है।"

3 और मुखिया पुजारी बाके ऊपर निरी बातन को दोस लगात रहे। 4 पिलातुस बासे फिर पूँछी, "तू जबाब काहे ना देथै? देख जे तेरे ऊपर कित्ते बातन को दोस लगाए रै हैं।"

5 ईसु फिर कछु जबाब नाय दई; तौ पिलातुस कै बड़ा अचम्मो भौ।

6 पिलातुस हर फसह के त्योहार मैं कोई एक कैदी कै जोकै लोग चहात रहैं, उनके ताहीं छोड़ देत रहै। 7 बरअब्बा नाओं को एक आदमी बे दंगाईयन के संग कैदी रहै, जो दंगा मैं हत्या करी रहैं। 8 तौ भीड़ ऊपर जाएकै बासे नहोरे करन लागी, जैसो तू हमरे ताहीं करत आओ है बैसोई कर दे। 9 तौ पिलातुस उनकै जबाब दई, "का तुम जौ चाहथौ कि तुमरे ताहीं यहूदियन के राजा कै छोड़ देयौं?" 10 काहैकि बौ सब जानत रहै, कि मुखिया पुजारी बाकै धोके से पकड़बाई है।

11 लेकिन मुखिया पुजारी आदमिन कै भड़काईं, और जौ बोलन कै कही कि बौ बरअब्बा कै उनके ताहीं छोड़ देबै। 12 जौ सुनकै पिलातुस उनसे फिर पूँछी, "तौ जोकै तुम यहूदिन को राजा कहथौ, बाको मैं का करौ?"

13 बे फिर चिल्लाईं, "बाकै क्रूस मैं टँगबाए दे!"

14 पिलातुस उनसे कही, "काहे? बौ का बुरो काम करी है?" लेकिन भीड़ और जोड़ से चिल्लाए उठी बाकै क्रूस मैं टाँगौ।

15 पिलातुस भीड़ कै सांत करन के ताहीं बरअब्बा कै उनके ताहीं छोड़ दई, और ईसु कै कोड़ा लगबाए कै क्रूस मैं टाँगन ताहीं सौंप दई।

16 सिपईय्या ईसु कै राज्यपाल के महल के भीतर के आँगन मैं लैगै, और हूँना पूरी पलटन बुलाएकै इखट्टो करीं। 17 तौ बाकै बैंजनी लत्ता पहनाईं और कांटो को मुकुट बनाएकै बाके मूड़ मैं पैंधाय दईं। 18 और बासे जौ कहीं "ओ यहूदियन के राजा तेरी लम्बी उमर होबै!" 19 और बे बाके मूड़ मैं डंडा मारते, थूकते, और घुपटियाय कै बासे नमस्ते करतै रहे। 20 जब बाको बे मजाक उड़ाए चुके, तौ बाके ऊपर से बैंजनी लत्ता उतारकै बहे के लत्ता पहनाए दईं; और फिर बाकै क्रूस मैं टँगलान ताहीं दुआरे लाए कै चल दईं।

21 सिकन्दर और रूफुस को दऊवा सिमौन, जो एक कुरेनी आदमी रहै, बौ कोई गाँव से आत रहै और बौ बहे रस्ता से गुजरो; तौ बाकै आदमी जबरजत्ती पकड़ लईं ताकी बाको क्रूस उठाएकै पहुँचाए आबै। 22 बे ईसु कै गुलगुता (जाको मतलब खोपड़ी की जघा) मैं लैकै आए। 23 हूँना बे ईसु कै मुर्र मिली भइ दाखरस पिबामैं, लेकिन बौ नाय पी। 24 तौ बे बाकै क्रूस मैं चढ़ाईं, और बाके लत्ता ताहीं परची डारीं फिर आपस मैं बाँट लईं। 25 सुबेरे के नौ बजे रहैं, जब बे बाकै क्रूस मैं टाँगीं। 26 और बाके दोसपत्‌र मैं जौ लिखकै बाके ऊपर टाँगो गौ "यहूदियन को राजा।" 27 बे बाके संग दुई चुट्टन कै क्रूस मैं टाँगीं, एक कै दहने घाँईं और दुसरो बाके बाँए घाँईं। 28 जौ लेख कि "ईसु अपराधिन संग गिनों गौ" और पूरो भौ।*

29 रहामैं आन-जान बारे आदमी अपनो मूड़ हलाए-हलाए कै ईसु की बुराई करत भै जात रहैं, "देखौ! मंदिर कै गिरान बारो और तीन दिन मैं बनानबारो! 30 क्रूस मैं से उतरकै अपने आपकै बचा!"

31 बैसिये मुखिया पुजारी यहूदि नियम के सिक्छक मिलकै बाको मजाक उड़ात भौ कहमैं; "जौ औरन कै बचाई लेकिन अपने आपकै काहे ना बचाए पाई। 32 अब इस्राएल को राजा मसीह क्रूस तरे उतर आबै तौ हम बाके ऊपर बिस्वास करैं।" जिनकै ईसु के संग टाँगीं रहैं, बेऊँ ईसु की बेजती करीं।

33 और दुपारी मैं सबै देस मैं अंधियारो छाए गौ और तीन घंटा रहो। 34 दुपारी के तीन बजे ईसु जोड़ से चिल्लाए कै कही, "इलोई, इलोई, लमा सबक्तनी?" जाको मतलब है "मेरे परमेस्वर, मेरे परमेस्वर, तू मोकै काहे छोड़ दौ?"

35 जो बाके झोने ठाड़े रहैं उनमैं से जौ सुनकै कोई कहीं, "देखौ बौ एलिय्याह कै पुकार रौ है।" 36 तौ उनमैं से एक दौड़कै बरछा कै सिरका के सोकता मैं डुबाई, और डंडा के सिरा मैं भाँदकै बाकै चुसाय कै बासे कहन लागो, "देखैं, एलिय्याह जाकै क्रूस से तरे उतारन आथै कि ना।"

37 तौ ईसु जोड़ से चिल्लाई और ज्यान त्याग दई।

38 मंदिर को परदा ऊपर से तरे ले फटकै दुई टुकड़ा हुई गौ। 39 हूँना बाके अग्गु ठाड़ो कप्तान ईसु कै चिल्लात और ज्यान छोड़त भै देखी, तौ बौ कही, "सच्ची मैं जौ आदमी, परमेस्वर को लौड़ा रहै।"

40 बाकै तमान बईंय्यरैं दूर से देखत रहैं, बामै मरियम मगदलीनी, छोटो याकूब और योसेस की अईय्या मरियम और सलोमी रहैं। 41 जब बौ गलील मैं रहै तौ जे बाके पच्छू हुई लेत रहैं; और बाकी सेवा-टहल करत रहैं। औरौ निरी बईंय्यरैं रहैं; जो बाके संग यरूसलेम मैं आई रहैं।

42 जब संजा खिन हुई गई काहैकि जौ दिन तैयारी को रहै, जौ साबत के एक दिन के अग्गु को रहै। 43 अरिमतियाह को रहेन बारो यूसुफ आओ, और बौ महासभा को मानो भौ मनतरी रहै। और खुद बौ परमेस्वर के राज्य के इंतजार मैं रहै। बौ हिम्मत भाँदकै पिलातुस के झोने गौ और ईसु की लास माँगी। 44 पिलातुस कै अचम्मो भौ की बौ इत्ती जल्दी मर गौ; और बौ सूबेदार कै बुलाएकै पूँछी, कि बाके मरे कित्ती देर भइ है? 45 फिरौंकी बौ सूबेदार से सब खबर लैकै यूसुफ कै ईसु की लास दिबाए दई। 46 तौ बौ एक लीनन को चद्दर लई, और लास कै बामै लिपटाए दई, और एक कबर मैं जो चट्टान मैं खोदी गई रहै धरी, और कबर के मोहोंट मैं एक भारी पथरा ढुरकाय दईं। 47 मरियम मगदलीनी और योसेस की अईय्या मरियम देखत रहैं कि बाकै कहाँ धरी हैं।