रूप परिवर्तन
1 छै दिन बाद ईसु पतरस और याकूब और बाके भईय्या यूहन्ना कै संग लई, उनकै एकांत मैं कोई ऊँचे पहाड़ मैं लैगौ। 2 और हूँना उनके अग्गु बाको रूप बदल गौ बाको मोहों सूरज के हानी चमकन लगो और बाके लत्ता उजीते के हानी उजले हुईगै। 3 तभई मूसा और एलिय्याह ईसु के संग बतकात भै चेलन कै दिखाई दईं। 4 तौ पतरस ईसु से कही, "प्रभु, हमरे हींना रहनो अच्छो है; अगर तेरी इच्छा होबै तौ मैं हींना तम्बु बनामौं; एक तेरे ताहीं, एक मूसा ताहीं, और एक एलिय्याह के ताहीं।"
5 बौ बोलतै रहै, कि एक उजलो बादर बाकै ढोंक लई, और बौ बादर मैं से जौ अबाज निकरी, "जौ मेरो प्रिय लौड़ा है, जासे मैं खुस हौं: जाकी सुनौ।"
6 चेला जौ सुनकै मोहों के बल गिर गै और बड़ा डराय गै। 7 पर ईसु झोने आयकै उनकै छुइ, और कही, "उठौ, डराबौ मत्ती।" 8 तौ बे अपनी आँखी उठाएकै ईसु कै छोड़ और कोई कै ना देखीं।
9 जब बे पहाड़ से उतरत रहैं तौ ईसु उनकै आग्या दई, "जबले इंसान को लौड़ा मरे भैन मैं से जिंदो ना हुई जागो, तौले जो कछु तुम देखे हौ कोई से मत कहियो।"
10 और बाके चेला बासे पूँछी, "तौ यहूदि नियम के सिक्छक काहे कहथैं, कि एलिय्याह को पहले आनो जरूरी है?"
11 ईसु जबाब दई, "एलिय्याह तौ जरूर आगो और सब कछु सुधारैगो। 12 लेकिन मैं तुमसे कहथौं, कि एलिय्याह आए चुको है; और बे बाकै नाय पैहचानीं; पर जैसो चाँहीं बैसोई बाके संग करीं। जहे बजह से इंसान को लौड़ा भी उनके हात से दुख उठाबैगो।"
13 तौ चेला समझीं कि बौ हमसे यूहन्ना बपतिस्मा देनबारे के बारे मैं कही रहै।
भूत पकड़े भै लौड़ा कै ईसु अच्छो करी
(मरकुस 9:14-29; लूका 9:37-43)