ईसु कै मारन की योजना
(मरकुस 14:1,2; लूका 22:1,2; यूहन्ना 11:45-53)
1 जब ईसु जे सब बात कह चुको, तौ अपने चेलन से कहेन लगो, 2 26:2 निर्गमन 12:1-27"तुम जानथौ, कि दुई दिन के बाद फसह को त्योहार होबैगो; और इंसान को लौड़ा क्रूस मैं चढ़ाओ जान के ताहीं पकड़बाओ जागो।"
3 तौ मुखिया पुजारी और परजा के बड़े-बूढ़े कैफा नाओं के मुखिया पुजारी के आँगन मैं जुराने, 4 और आपस मैं बतकान लागे कि ईसु कै धोका से पकड़वाए कै मार डारैं। 5 "पर बे कहेत रहैं, त्योहार के समय नाय; कहीं ऐसो ना होबै कि आदमिन मैं हुल्लड़ मच जाबै।"
ईसु के ऊपर बैतनिय्याह मैं कीमती इत्तर छींची
(मरकुस 14:3-9; यूहन्ना 12:1-8)
6 जब ईसु बैतनिय्याह मैं सिमौन कोहढ़ी के घरै रहै। 7 26:7 लूका 7:37,38तौ एक बईय्यर संगमरमर के बर्तन मैं कीमती इत्तर लैकै बाके झोने आई, और जब बौ खानु खान बैठो रहै, तौ बाके मूड़ मैं अखनाए दई। 8 जौ देखकै, बाके चेला गुस्सा भै और कहेन लगे, "जौ चीज काहे बरबाद करो?" 9 "जौ अच्छे रुपईया मैं बेचकै गरीबन कै बाँटो जाए सकथै!"
10 जौ देखकै ईसु उनसे कही, "जौ बईय्यर कै काहे परेसान कर्रै हौ? बौ मेरे संग भलाई करी है। 11 26:11 व्यवस्थाविवरन 15:11गरीब तुमरे संग हमेसा रैहथैं, पर मैं तुमरे संग हमेसा नाय रैहंगो। 12 बौ मेरी सरीर मैं जो इत्तर उड़ेली है, बौ मेरे गाड़े जान के ताहीं करी है। 13 अब, मैं तुमसे सच कहथौं, कि पूरी दुनिया मैं जितै कहीं जौ सुसमाचार प्रचार करो जागो, हूँना बाके जौ काम की बात बाकै याद करन के ताहीं करो जागो।"
यहूदा ईसु कै धोका देन के ताहीं मान गौ
(मरकुस 14:10,11; लूका 22:3-6)
14 तौ यहूदा इस्करियोती जो बहारै चेलन मैं से एक रहै, मुखिया पुजारी के झोने जाएकै कही, 15 26:15 जकर्याह 11:12 "अगर मैं बाकै तेरे हात पकड़वाए दियौं, तौ मोकै का देगो?" बौ बाकै तीस चाँदी के सिक्का तौल कै दै दई। 16 तौ से यहूदा ईसु कै उनके हवाले करन कै एक अच्छो मौका ढूँड़त रहै।
ईसु अपने चेलन के संग फसह को खानु खाईं
(मरकुस 14:12-21; लूका 22:7-13,21-23; यूहन्ना 13:21-30)
17 अखमीरी रोटी के त्योहार के पहले दिन चेला ईसु के झोने आयकै बासे पूँछीं, "तैं कहाँ चाहथै कि हम तेरे ताहीं फसह को खानु की तैयारी करैं?"
18 "बौ कही, नगर मैं फलाने के झोने जाएकै बासे कह, कि गुरु कहथै, कि मेरो समय झोने है, मैं अपने चेलन के संग तेरे हींना फसह मनांगो।"
19 ईसु जैसी बताई रहै, चेला फसह के खानु की तैयारी करीं।
20 जब संजा खिन भइ, तौ बौ बहारै चेलन के संग खानु खान के ताहीं बैठो। 21 जब बे खात रहैं, तौ ईसु कही, "मैं तुमसे सच कहथौं, कि तुम मैं से एक मोकै पकड़बागो।" 22 जौ बात से बे बड़ा उदास भै, और बासे पूँछन लागे, "गुरुजी, का बौ मैं हौं?" 23 ईसु जबाब दई, "जो मेरे संग थरिया मैं हात डारी है, बहे मोकै पकड़बागो। 24 जैसी इंसान के लौड़ा के बारे मैं लिखो है, बौ जौ दुनिया से जाथै; पर बौ इंसान के ताहीं भयानक है जोके जरिया इंसान को लौड़ा पकड़बाओ जाथै: अगर बौ इंसान को जनम ना होतो, तौ बाके ताहीं भलो होतो!"
25 तौ बाको पकड़वान बारो यहूदा पूँछी, "हे रब्बी, का बौ मैं हौं?" ईसु जबाब दई, "तैं कह लौ।"
प्रभु को खानु
(मरकुस 14:22-26; लूका 22:14-20; 1 कुरिन्थियों 11:23-25)
26 जब बे खात रहैं, तौ ईसु रोटी लई, और आसीस माँग कै तोड़ी, और चेलन कै दैकै कही, "लियौ, खाबौ; जहे मेरी सरीर है।"
27 फिर बौ कटोरा लई और धन्यवाद करी, और उनकै दैकै कही, "तुम सब जामैं से पीबौ, 28 काहैकि जौ मेरो वाचा को खून है, जो निरेन के ताहीं पापन की माफी के ताहीं बहाओ जाथै। 29 मैं तुमसे कहथौं, कि जौ दाखरस बौ दिन ले कहु ना पींगो, जबले तुमरे संग अपने दऊवा के राज्य मैं नया ना पीमौं।"
30 फिरौंकी बे गाना गायकै जैतून के पहाड़ मैं गै।
ईसु पतरस के इंकार की भविस्यवाँड़ी करी
(मरकुस 14:27-31; लूका 22:31-34; यूहन्ना 13:36-38)
31 26:31 जकर्याह 13:7 तौ ईसु उनसे कही, "आज की रात तुम सब भाज जाबैगे, और मोकै छोड़ देगे, काहैकि सास्त्र कहथै, ‘परमेस्वर बरदिया कै मार देगो और झुंड की भेंड़ैं बिगद जांगी।’ 32 26:32 मत्ती 28:16 लेकिन जब मैं जिंदो हुई जांगो, तौ तुमसे पहले गलील जांगो।"
33 पर पतरस बासे कही, "अगर सब तोकै छोड़ैं तौ छोड़ैं, पर मैं कहु ना छोड़ंगो।"
34 ईसु पतरस से कही, "मैं तोसे सच कहथौं की आज रात मुर्गा बोलन से पहले तैं तीन बारो कहैगो कि मैं जाकै ना जानथौं।"
35 पतरस जबाब दई, "जौ मैं कहु ना कहेंगो, भलेई मोकै तेरे संग मरन पड़ै!"
और बाकी के चेलौ जहे कहीं।
ईसु गतसमनी की बगिया मैं प्रार्थना करी
(मरकुस 14:32-42; लूका 22:39-46)
36 तौ ईसु अपने चेलन के संग गतसमनी नाओं की जघा मैं गौ, और बौ उनसे कही, "मैं हींना बैठकै प्रार्थना कर रौ हौं।" 37 बौ अपने संग पतरस और जब्दी के लौड़ा कै लैगौ, दुखी और परेसान होन लगो। 38 और बौ उनसे कही, "मेरो मन भौत उदास है, हिंयाँ ले कि मेरी ज्यान निकरी जाए रई है। तुम हीनैं रुकौ, और मेरे संग जगत रहाबौ।"
39 फिर बौ थोड़ी और अग्गु बढ़कै मोखरा गिरो, और ऐसे प्रार्थना करन लगो, "मेरे दऊवा, अगर हुई सकै, तौ जौ कटोरा मोसे टल जाबै, फिर भी जैसी मैं चाहथौं बैसो नाय, पर जैसी तैं चाहथै बैसो होबै।"
40 फिर चेलन के झोने आयकै उनकै सोत भौ पाई, और पतरस से कही, "का तुम मेरे संग घंटा भर ना जग सके? 41 जगत रहाबौ, और प्रार्थना करत रहाबौ, कि तुम परिक्छा मैं ना पड़ो! आत्मा तौ तैयार है, पर सरीर कमजोर है।"
42 फिरौंकी बौ दुसरी बार जाएकै प्रार्थना करी, "मेरे दऊवा, अगर जौ मेरे पिये बगैर ना हट सकथै तौ तेरी इच्छा पूरी होबै।" 43 तौ बौ आयकै उनकै फिरौंकी सोत पाई, काहैकि उनकी आँखी निंधानि रहैं।
44 और उनकै छोड़कै फिरौंकी चलो गौ, और बहे बात कहकै, तिसरी बार प्रार्थना करी। 45 तौ बौ चेलन के झोने आयकै उनसे कही, "अब सोत रहाबौ, और आराम करौ: देखौ, समय आए पहोंचो है, और इंसान को लौड़ा पापिन के हात से पकड़बाओ जाथै। 46 उठौ, चलैं; देखौ, मेरो पकड़वान बारो झोने आए पहोंचो है।"
ईसु की गिरफ्तारी
(मरकुस 14:43-50; लूका 22:47-53; यूहन्ना 18:3-12)
47 बौ जौ कहतै रहै कि, यहूदा जो बहारैयन मैं से एक रहै, आओ, और बाके संग मुखिया पुजारिन और आदमिन के बड़े-बूढ़ेन के घाँईं से बड़ी भीड़, तलवारन और लठियन कै लै भै आए। 48 बाको पकड़वान बारो उनकै जौ चिन्ह बताए दई रहै: "जोकै मैं चूम लियौं बहे है; बाकै पकड़ लियो!"
49 यहूदा तुरंतै ईसु के झोने आयकै कही, "रब्बी, नमस्ते!" और बाकै चुम्मी लई।
50 ईसु जबाब दई, "दोस्त, जो काम के ताहीं तैं आओ है, बाकै कर ले।"
तौ बे झोने आयकै ईसु के ऊपर हात डारी और बाकै पकड़ लईं। 51 तौ ईसु के संग बारेन मैं से एक हात बढ़ायकै अपनी तलवार खींची और बड़े पुजारी के सेवक ऊपर चलाय कै बाको कान काट दई। 52 तौ ईसु बासे कही, "अपनी तलवार हूँनै रख ले काहैकि जो तलवार चलाथैं, बे सब तलवार से नास करे जांगे। 53 का तैं ना समझथै, कि मैं अपने दऊवा से नहोरे कर सकथौं, और बौ स्वर्गदूतन की बहारै सेना दल से जद्धे मेरे झोने हबइ भेज देगो? 54 पर पवित्र सास्त्र की बे बातैं कि ऐसोई होनो जरूरी है, कैसे पूरी होंगी?"
55 बहे समय ईसु भीड़ से कही, "का तुम तलवार और लठिया लैकै मोकै डाँकुअन के हानी पकड़न के ताहीं निकरे हौ? मैं सब दिन मंदिर मैं बैठकै उपदेस देत रहौं, और तुम मोकै ना पकड़े। 56 पर जौ सब तभई भौ है, कि भविस्यवक्ता पवित्र सास्त्र मैं जो कुछ लिखो है बौ पूरो होबै।"
तौ सब चेला बाकै छोड़कै भाज गै।
परिसद के अग्गु ईसु
(मरकुस 14:53-65; लूका 22:54,55,63-71; यूहन्ना 18:13,14,19-24)
57 जो आदमी ईसु कै गिरफ्तार करीं रहैं, बे बाकै कैफा के घरै, बड़े पुजारी के झोने लैगै जितै यहूदि नियम के सिक्छक और बड़े-बूढ़े जुराने रहैं। 58 पतरस दूर से बाको पीछा करी जितै ले बड़े पुजारी को आँगन रहै बौ आँगन मैं गौ और सिपईय्यन संग बैठकै जौ देखन लागो कि अब बौ कैसे निकरैगो। 59 मुखिया पुजारी और पूरे बड़े सभा के ईसु कै मार डारन के ताहीं बाके बिरोध मैं झूठे सबूत ढूँड़न लगे। 60 पर भौत से झूठे गभन के आन मैं भी ना पाई, आखरी मैं दुई जनी आए, 61 26:61 यूहन्ना 2:19और कही, "जौ कही कि मैं परमेस्वर के मंदिर कै ढ़ाय सकथौं और बाकै फिर से तीन दिन मैं बनाये सकथौं।"
62 बड़ो पुजारी ठाड़कै ईसु से कही, "का तेरे पास जौ आरोप को कोई जबाब ना है?" 63 पर ईसु चुप्पा रहो। तौ बड़ो पुजारी बासे कही "मैं तोकै जिंदे परमेस्वर की कसम देथौं, कि अगर तैं परमेस्वर को लौड़ा मसीह है, तौ हमसे कहदे।"
64 ईसु बासे कही, "तैं खुदै कह दौ; बल्किन मैं तुमसे जहो कहथौं, कि अब से तुम इंसान के लौड़ा कै सर्वसक्तिमान के दहने घाँईं बैठे, और आसमान के बादर मैं आत देखैगे।"
65 तौ बड़ो पुजारी अपने लत्ता फाड़कै कही, "जौ परमेस्वर की बुराई करी है, अब हमकै गभा की कोई जरूरत ना है! देखौ, तुम हबै जौ बुराई सुने हौ! 66 तुम का समझथौ?" बे जबाब दई, "जौ मौत की सजा पान के काबिल है।"
67 26:67 यसायाह 50:6 तौ बे बाके मोहों मैं थूकीं और बाकै घूँसा मारी, दुसरे चाँटा मारकै 68 कहीं, "मसीह! हमरे ताहीं भविस्यवाँड़ी करकै कह कि कौन तोकै मारी!"
पतरस के जरिया ईसु कै नकारनो
(मरकुस 14:66-72; लूका 22:56-62; यूहन्ना 18:15-18,25-27)
69 पतरस बहार आँगन मैं बैठो रहै कि बड़े पुजारी की एक सेविका बाके झोने आयकै कही, "तहूँ ईसु गलीली के संग रहै।"
70 बौ सबके सामने जौ कहकै मना करी और कही, "मैं ना जानथौं तू का कह रइ है।" 71 और जब बौ बहार फाटक के मोहोंट झोने गौ, तौ दुसरी बईय्यर बाकै देखकै उनसे जो हूँना रहैं कही, "जहो तौ ईसु नासरी के संग रहै।"
72 पतरस फिरौंकी जबाब दई, "मैं कसम खाथौं कि जौ इंसान कै नाय जानथौं!"
73 थोड़ी देर बाद हूँना ठाड़े भै पतरस के झोने आए। "बे कहीं, सच मैं तैं उनमैं से एक है। काहैकि तेरे बोलन के ढंग से पता चल रौ है!"
74 पतरस कही, "मैं कसम खाथौं कि मैं सच्ची कहरौ हौं! अगर मैं नाय हौं तौ परमेस्वर मोकै सजा देमैं! मैं बौ आदमी कै नाय जानथौं!"
तभईये एक मुर्गा बास दई, 75 पतरस कै याद आओ कि ईसु बासे का कही रहै: "मुर्गा बासन से पहले, तैं तीन बार कहैगो कि मोए ना जानथै।" बौ बहार गौ और बिलक-बिलक कै रोन लगो।