1 फिर आत्मा ईसु कै सैतान के जरिया परिक्छा करन के ताहीं मरुसथल मैं लै गई। 2 चालीस दिन और चालीस रात बर्त रहन के बाद ईसु कै भूंक लगी। 3 तब सैतान बाके झोने आओ और लालच देत भै कही, "अगर तैं परमेस्वर को लौड़ा है, तौ जे पथरन कै रोटी बनान के तहीं कह।" 4 ✝4:4 व्यवस्थाविवरन 8:3 पर ईसु जबाब दई, "सास्त्र कहथै, ‘इंसान सिरफ रोटी से ही जिंदो नाय रह सकथै,’ लेकिन हर बौ सब्द से जीथै जो परमेस्वर बोलथै।"

5 फिर सैतान ईसु कै यरूसलेम के पवित्र सहर मैं लै जाएकै, बौ बाकै मंदिर के सबसे ऊँची जघा मैं खड़ो करकै। 6 ✝4:6 भजन संहिता 91:11,12 और बासे कही, "अगर तैं परमेस्वर को लौड़ा है, तौ अपने आपकै नीचे फेंक दे, काहैकि सास्त्र कहथै,

‘परमेस्वर तेरी देखभार करन के ताहीं स्वर्गदूतन कै आग्या देगो

ताकी तोकै हातौ हात उठाए लेंगे,

ताकी तेरे पैर मैं पथरा से चोट ना लगै।’"

7 ✝ 4:7 व्यवस्थाविवरन 6:16 ईसु जबाब दई, "लेकिन सास्त्र जौ भी कहथै, ‘अपने प्रभु परमेस्वर की परिक्छा मत कर।’" 8 जब सैतान ईसु कै भौत ऊँचे पहाड़ मैं लैगौ और बाकै दुनिया के सबै राज्यन कै अपनी महानता मैं दिखाई। 9 "सैतान कही, जौ सब मैं तोकै देंगो, अगर तैं झुककै मेरी आराधना करैगो।"

10 ✝ 4:10 व्यवस्थाविवरन 6:13 तौ ईसु जबाब दई, "सैतान चले जा! सास्त्र कहथै, ‘प्रभु अपने परमेस्वर की आराधना कर और सिरफ बहे की सेवा कर!’"

11 तौ सैतान ईसु के छोड़ दई; और स्वर्गदूत आयकै बाकी सेवा और मदत करीं।

12 ✝ 4:12 मत्ती 14:3; मरकुस 6:17; लूका 3:19,20 जब ईसु सुनी कि यूहन्ना कै कैदखाना मैं डार दौ गौ है, तौ बौ गलील लौट आओ। 13 ✝4:13 यूहन्ना 2:12 लेकिन बौ नासरत मैं नाय ठहरो, लेकिन जबूलून और नप्ताली के इलाका मैं गलील झील के एक सहर कफरनहूम मैं रहन लगो। 14 ऐसो तभई भौ कि परमेस्वर यसायाह भविस्यवक्ता के जरिया जो कही रहै बौ पूरो हो।

15 ✝ 4:15 यसायाह 9:1,2 "जबूलून की जमीन और नप्ताली के देस,

समुंदर के रस्ता मैं, यरदन नदिया के पछार मैं

गैर यहूदिन के देस गलील मैं!

16 जो आदमी अंधियारे मैं जीथैं ,

बे एक महान जोती देखीं।

जो मौत की छाया के देस मैं रहत रहैं उनके ऊपर

जोती उनके ऊपर चमकी।"

17 ✝ 4:17 मत्ती 3:2 बौ समय से ईसु अपनो प्रचार सुनानो सुरु करी: "अपने पापन से मन फिराबौ काहैकि स्वर्ग को राज्य झोने है!"

18 जैसे ईसु गलील झील के किनारे कै गौ, बौ दुई भईय्यन कै देखी, जो मछरेया रहैं, सिमौन पतरस और बाको भईय्या अन्द्रियास, एक संग जार से झील मैं मच्छी मारत रहैं। 19 ईसु उनसे कही, "मेरे पच्छू चले आबौ, मैं तुमकै सिखांगो मच्छी पकड़न के बजाय इंसानी रूपी मच्छी कैसे पकड़ी जाथैं।" 20 बे तुरंतै अपनो जार छोड़कै बाके संग चले गै।

21 फिर बौ हुँआँ से अग्गु चल पड़ो और बौ देखी कि, जब्दी को लौड़ा याकूब और बाको भईय्या यूहन्ना कै देखी। बे अपने दऊवा के संग नईंयाँ मैं जार सुरजात रहैं, ईसु उनकै बुलाई। 22 और बे तुरंत नईंयाँ और अपने दऊवा कै छोड़कै बाके पच्छू चले गै।

23 ✝ 4:23 मत्ती 9:35; मरकुस 1:39 ईसु गलील परदेस मैं यहूदि सभाघरन मैं स्वर्ग के राज्य को सुसमाचार को उपदेस देतो और सब तरह के रोग और बिमारन कै चंगो करत भै घूमन लगो। 24 बाके बारे मैं पूरे सीरिया तक खबर फैल गई, तभई लोग जो बिमार रहैं और तरह-तरह के रोग और दुखन से दुखी रहैं, जिनमैं प्रेत आत्मा सवार रहैं, जिन्हैं मिर्गी आत रहै और जो फालिस के मारे रहैं बाके झोने लान लगे, और ईसु उन्हैं चंगो करी। 25 तभई गलील दिकापुलिस जोके दस सहर कहो जाथै, यरूसलेम, यहूदिया, और यरदन नदिया के पार लोगन की बड़ी-बड़ी भीड़ बको अनुसरँड़ करन लगी।