1 मैं मसीह मैं सच्ची कहथौं, और झूठ नाय बोलथौं और मेरो मन पवित्र आत्मा मैं गभाई देथै। 2 जब मैं कहथौं कि मेरो दुख कितनो बड़ो है, मेरे दिल मैं कितनो दर्द है 3 काहैकि मैं हिंयाँ तक चाहथौं, कि मेरे लोगन के ताहीं जो सरीर के हिसाब से तौ मेरे कुरमा टब्बर हैं, बे अपने आपै मसीह से स्रापित और न्यारे हुई जाते। 4 बे परमेस्वर के लोग इस्राएली हैं; बौ उन्हैं अपनो बालका बनाई, और अपनी महिमा उनके ऊपर दिखाई; बौ उनके संग अपनी वाचा भाँदी और उन्हैं नियम दई; उनके पास सच्ची आराधना है; बे परमेस्वर की प्रतिग्यन कै पाईं हैं; 5 नामी इब्रानी पुरखा उन्हईं के हैं, मसीह सरीर के भाव से उन्हईं मैं से भौ। सबन के ऊपर परम परमेस्वर हमेसा-हमेसा धन्य होबै। आमीन।

6 लेकिन ऐसो ना है कि परमेस्वर को बचन टल गौ, तभईये कि जो इस्राएल के बंस हैं बे सब इस्राएली नाय हैं; 7 और ना अब्राहम के बंस होन के बजह से सबै बाके बालका भै, लेकिन लिखो है "इसहाक से तेरो बंस कहलाओ जागो।"✝ 8 जाको मतलब सरीर से पैदा भै बालका परमेस्वर के बालका ना हैं; जाके बजाय, परमेस्वर के वादा के हिसाब से पैदा भै बालका सच्चे बंसज माने जाथैं। 9 परमेस्वर को वादा जे बचन से है: "मैं सई समय मैं दुबारा आंगो, और सारा को लौड़ा होगो।"

10 और जौ काफी ना है; रिबका के दुई लौड़न को बाबा एकै रहै, हमरे पुरखा इसहाक। 11 फिर भी, जासे पहले कि जुड़वा बालका पैदा होमैं या बे कछु अच्छो या बुरो करै, ताकी चुनन मैं परमेस्वर को उद्देस्य खड़ो हुई सकै: 12 काम से नाय, बल्किन बाके जरिये जो बुलाथै-बाकै बताओ गौ रहै, "बड़ो छोटे कि सेवा करै।" 13 जैसो कि सास्त्र मैं लिखो पड़ो है, "मैं याकूब से प्यार करो, पर एसाव *कै नफरत करत रहौं।"

14 तौ हम का कहमैं? का परमेस्वर के हिंयाँ अधर्म और अन्याय है? कतई नाय। 15 काहैकि बौ मूसा से कहथै,

"मैं जोके ऊपर दया करनो चाहमौं बाके ऊपर दया करंगो,

और जो कोई ऊपर किरपा करनो चाहमौं, बहे ऊपर किरपा करंगो।"

16 तौ फिर, जो इंसान चाहथै और जो करथै बाके ऊपर कछु निर्भर नाय करथै, लेकिन खाली परमेस्वर कि दया के ऊपर निर्भर करथै। 17 काहैकि पवित्र सास्त्र मिस्र के राजा फिरौन से कहो गौ, "मैं तोकै तभईये ठड़बाओ हौं कि तेरे मैं हुईकै अपनी सामर्थ्य दिखामौं, और मेरे नाओं को प्रचार पूरी दुनिया मैं होबै।" 18 तभईये परमेस्वर जोकै चाहथै बहे के ऊपर दया करथै, और जोकै चाहथै बाको मन कर्‌रो कर देथै।

19 अब तैं मोसे कहेगो, "बौ फिर से काहेकै इल्जाम लगाथै? कौन बाकी मरजी को सामना करथै?" 20 इंसान, तू भला कौन है जो परमेस्वर को सामना करथै? का गढ़ी भइ कोई चीज गढ़नबारे से कह सकथै, "तैं मोकै ऐसो काहे बनाओ है?" 21 का कुम्हरा कै मट्टी मैं अधिकार ना है कि एकै लोंदा मैं से एक बर्तन आदर के ताहीं, और दुसरेन कै अनादर के ताहीं बनाबै?

22 और परमेस्वर जो करी है बहे सच है; बौ अपने गुस्सा कै दिखानो चात रहै, और अपनी ताकत को परिचय देनो चात रहै; लेकिन बौ बे लोगन कै धीरज देन मैं भोतै धीरज रखत रहै, जो बाके गुस्सा होन कि चीज रहैं, जो बिनास के ताहीं बरबाद रहै। 23 और बौ अपनी प्रचुर महिमा कै दिखानो चात रहै, जोकै हमरे ऊपर डारो गौ रहै जो बाकी दया कि चीज है, हममैं से जिनकै बौ अपनी महिमा पान के ताहीं तैयार करी है। 24 मतलब हमरे ऊपर जिनकै बौ नाय सिरफ गैर यहूदियन मैं से, बल्किन गैर यहूदिन मैं से मस्काईं। 25 जैसे कि बौ होसे नाओं कि किताब मैं भी कहथै,

जो मेरे लोग ना रहैं,

उनकै मैं अपने लोग कहेंगो,

और जो लोगन से मैं प्यार नाय करथौं,

उनकै प्रिय कहेंगो।

26 और, "ऐसो होगो कि जो जघा मैं उनसे ऐसो कहो गौ रहै कि

तुम मेरे लोग नाय हौ, बहे जघा बे जिंदे परमेस्वर के बालका कहे जामंगे।"

27 और यसायाह भविस्यवक्ता इस्राएल देस के बारे मैं चिल्लाए कै कही है, "चाँहे इस्राएल के बालका की गिनती समुंदर के रेता के बराबर होबै, तहुँओं उनमैं से थोड़ी एक बचंगे। 28 काहैकि प्रभु अपनो बचन दुनिया मैं जल्दिये पूरो करैगो।" 29 जैसे कि यसायाह भविस्यवक्ता पहले भी कही रहै,

"अगर सेना को प्रभु हमरे ताहीं एकौ बंस नाय छोड़तो,

तौ हम सदोम के हानी हुई जाते, और अमोरा के हानी होते।"

30 अब हम का कहमैं? कि गैर यहूदि जो धार्मिकता की खोज नाय करत रहैं, धार्मिकता कै लै लईं, यानी की बौ धार्मिकता कै जो बिस्वास से है; 31 लेकिन परमेस्वर के आदमी इस्राएली, जो धर्म के नियम की खोज करत रहैं बौ नियम तक नाय पुगे। 32 कौनके ताहीं? तभईये कि बे बिस्वास से नाय, लेकिन जैसे मानौ करमन से बाकी खोज करत रहैं। और इसलै बे बौ ठोकर के "पथरा से ठोकर खाईं" 33 जैसे कि सास्त्र मैं लिखो है,

"देखौ मैं सिय्योन पहाड़ मैं

एक ठेस लगन को पथरा,

और ठोकर खान की चट्टान रखथौं,

और जो बाके ऊपर बिस्वास करैगो बौ कहु उदास नाय होगो।"