Mateus 3

1 ‌ʻI he ngaahi ʻaho ko ia naʻe haʻu ʻa Sione ko e Papitaiso, ʻo malanga ʻi he toafa ʻo Siutea, 2 ‌ʻo pehē, "Mou fakatomala: he ʻoku ofi ʻae puleʻanga ʻoe langi." 3 He ko eni ia naʻe lea ki ai ʻae palōfita ko ʻIsaia, ʻo pehē,

"Ko e leʻo ʻoe tokotaha ʻoku kalanga ʻi he toafa,

‘Mou teuteu ʻae hala ʻoe ʻEiki,

fakatonutonu hono ngaahi ʻaluʻanga.’"

4 Pea naʻe kofu ʻae Sione ko ia ʻaki ʻae fulufuluʻi kāmeli, mo e noʻo kiliʻi manu ʻi hono noʻotanga vala; pea ko ʻene meʻakai, ko e heʻe mo e meʻa huʻamelie ʻoe vao. 5 Pea naʻe toki ʻalu kiate ia ʻa Selūsalema, mo Siutea kotoa pē, mo e potu fonua kotoa pē naʻe tuʻu ofi ki Sioatani, 6 Ke papitaiso ʻiate ia ʻi Sioatani, ʻo vete ʻenau ngaahi angahala.