Seytaani jaɗɗiɗ Yeesu fiir
1 Wa Yeesu puloh kalaŋ Yurdan, raak Fuuɗsi Hoolohngaani, Fuuɗsiŋ Kooh riifiɗ ɗe. Fuuɗseem kaɗɗukohhaa ɗe nduufa. 2 A nikka nga neeh ndaŋkiyaah-nikiis (40), ndaam, Seytaani fiireeɗa ɗe. A ñamɗi ŋ neeh ceem, ŋ mirndaani a aɗukka. 3 Weɗi Seytaani woyoh ɗe ne : « Nik ne fu Kuɓkiŋ Kooh ɗah, woya atoh fii wa ɓoƴsuk mbuuru. » 4 Yeesu loffa ɗe ne : « Fiis ci Hooliɗ ci woyiɗ ne : " Ɓo' na pesohe mbuuru dong haa.4:4 Rohƴiɗi 8:3 " »
5 Seytaani ɓayya ɗe ŋ ɗiska uup ɗafuk, a teeɓpa ɗe, ŋ harmban ñep na marak, nguur ciŋ adinaani jen. 6 A woosa ɗe ne : « Nguur cii jen na ini ŋ ɗooƴ ca degu ŋ yaah ciŋ ngo te ŋ miniɗ ca eɗ ɓoyi neɓ po. 7 Fu teyɗuk ƴek ŋ fikiiso ɗah, ŋ hey ɗa ca one jen. » 8 Yeesu loffa ɗe ne : « Fiis ci woo ne " Ƴekɗa Kooh Heɗ fu, te fu ñaamuk a yi dong.4:8 Rohƴiɗi 6:13 " »
9 Seytaani ɓayissa ɗe Yerusalem, ŋ jol Kahnaŋ Kooh, a woosa ɗe ne : « Nik ne fu Kuɓkiŋ Kooh ɗah, faɗsuka ŋ kehƴi ; 10 Fiis ci Hooliɗ ci woyiɗ ne : " Kooh hey nake malaakaaciŋ ɗe, ca niiɗ ɗa. " 11 Te : " Ca ɓay ɗa ŋ yaah ciŋ ca, po kot ciŋ ɗa laɓkanɗi ŋ atoh. " » 12 Yeesu nammba ɗe lof ne : « Fiis ci namiɗ woo ne : " Kana markisuk Kooh Heɗ fu.4:12 Rohƴiɗi 6:16 " »
13 Wa Seytaani jaɗiɗ ɗe fiir po a miniɗɗi ɗe in, a cootta, a sekɗoheeɗa ɗe mbeh wiiriis.