Luk 8

Yeesu hultiɗiɗ kuɓkiŋ Jayrus ɓitɓi

40 Wa a dokuk Galile, Yeesu raak ɓo' laayiɗ sekeeɗa ɗe. 41 Ɗekka po ƴaara na woyse Jayrus, ya adgohee sinaagoga hayya nga ɗe. A ƴekka ŋ fikiice a kiimmba ɗe ne a kaɗ kahan ce, 42 laam raak kuɓkaŋ ɗe cafƴa heeɗa kaane te a raakee ɗe yino, tel kuɓkeem yii ŋ kiis ndaŋkiyaah na kiis kanak ciŋ ɗe (12).

Wa Yeesu kaɗee nga, mboolnda ɗiifɗoheeɗa ɗe. 43 Ŋ ɗooƴ mboolnda, ɓitiɓ nikeen nga, ñif miŋ ɗe meeɗ meeɗ aamuk, a tumiɗ na kosaay keem kiis ndaŋkiyaah na kiis kanak (12), [a tumeen ina a raake jen ŋ paƴoh ca,] te ali ɓo' mineeɗi ɗe wiriɗ. 44 A lahha Yeesu finho, a laalla lecmiŋ kulɓaakiŋ ɗe ; ŋ ɗiska ɗiska, ñif maŋ ɗe aamkisɗi. 45 Yeesu meeksohha ne : « Ya ɓa laal lo ? » Yaa nu nga ɗah taaskeeɗa. Piyeer woosa ɗe ne : « Moo Kilifaani, ɓooɓi wil ɗa wil te ɓa ɗii ɗiifkoheeɗa ! » Yeesu woosa ɗe ne : 46 « Ee ! Waaye raakiɗ doolndi puloh nga so, weɗ tah ŋ inahha ne raakiɗ ɓoyi laal lo. »

47 Wa ɓitɓa inah ne a yeguuɗ, a saakɗoheeɗa, a ƴekka ŋ kot ciŋ Yeesu, a naandsukka ŋ fiki ɓooɓa jen, ini tah a laalla Yeesu na findi a wiroh ŋ ɗiska ɗiska. 48 Yeesu woosa ɗe ne : « Kosi fu kos wirɗiɗ ɗa, kaɗa moɗoɗ ɓitɓi. »

49 Wa Yeesu woyee, ɓo' pulohha kahan Jayrus, a woosa yeem ne : « Wa etohisɗi fu yaaɓɗe Jangɗohohi, kuɓkiŋ ɗa kaaniɗ. » 50 Yeesu kerahha nga a woosa Jayrus ne : « Kina neƴƴoh, kosa rek, kuɓkiŋ ɗa hey muce. »

51 Wa Yeesu ree kahna, ɗal Piyeer na Saaŋ na Saak na baab ɓi kuɓki na yaay ɓa ɗah, a faɗɗi ali ɓo' ne a aas na ɗe nga. 52 Ɓooɓa jen nikee rooyeeɗa kuɓka, Yeesu woosa ɓa ne : « Kanaat rooy, a kaanɗi, a na neehe. » 53 Ɓa njembteeɗa ɗe laam ɓa inheen ne a kaaniɗ. 54 Yeesu ammba yaahiŋ kuɓka, a woosa ŋ ɗafka ne : « Kuɓu kurka ! » 55 A hulitta, a jaarra kuruk. Yeesu woosa ɓa ne ɓa onaat kuɓka a ñam. 56 Yaay ɓa na baab ɓa feyuusa waaye Yeesu woosa ɓa ne ɓa kinaata woo ali ɓo'.