Lucas 9

Ɓaataŋ mbuuruuca

10 Wa Apootar ca puloh ɗisik ca ɓa tuuƴse, ɓa naandsukka Yeesu in ca ɓa haɓiɗ jen. Ƴutta, a ɓayya ɓa ŋ kur ka na woyse Betsayda, a ɗaayya na ɓa nga. 11 Waaye ɓooɓa yegga ineem, ɓa raakka ɗe nga. Yeesu teyɗukka ɓa, a woyeeɗa na ɓa ŋ ini kaɗ ŋ Nguuriŋ-Kooh, a wiriɗta kosaayiɗ ca.

12 Wa noha na niine, Apootar ci reɓpa ŋ Yeesu, ɓa woosa ɗe ne : « Ndii bilaf. Woya ɓooɓii ɓa kaɗ ŋ kur ci reɓ ndii, ɓa waaka ɗiski ɓa nikan na ini ɓa ñaman. » 13 Waaye a loffa ɓa ne : « Ɗu, eɗaat ɓa ini ɓaa hee ñame. » Ɓa woosa ɗe ne : « Ɓoo raak mbuuru yatuus na cuurund kanak dong ndii, te ɓoo minɗi ɓa kaɗ romɗa kañam jen ! » 14 Ƴaar ca ŋ ɗiska ɗaleen ree junni-yatuus (5000) wala ini uupa. A woosa taalubeeciŋ ɗe ne : « Woyaat ɓa, ɓa ɓoof ndaŋkiyaah-yatuus ndaŋkiyaah-yatuus (50-50). » 15 Ɓa haɓiɗta ini a woo, ɓa ɓoofiɗta ɓooɓa jen. 16 A ɓayya mbuuru ca yatuus ca na cuurund ca kanak ca, a taaknukka ŋ Eel ci, a gidimmba Kooh, a nguɗsohha ca, a eɗta taalubeeciŋ ɗe ne ɓa paysoh mboolnda ca. 17 Ɓooɓa jen ñammba po ɓa kappa. Ɓa tummba tasɗohiica ŋ pañe ndaŋkiyaah na kanak (12).