Apootar ca kaahay ca hotiɗ Yeesu na ndami nik nga ɗe.
28 Wa degga ini ɗal ree neeh yasna-kaahay ŋ finho woo ceem, Yeesu hunnda na Piyeer na Saaŋ na Saak ; a rappa ŋ tango ne a kiim Kooh. 29 Wa a na kiime, fikiiriŋ ɗe ɓoƴsukohha, kulɓaaciŋ ɗe nikka yaanow tar po ca melciɗeeɗa. 30 Ɗekka po ɓo' kanak woyeeɗa na ɗe, ɓa nikee woosuuɗ, Musaa na Ilyas. 31 Ɓa siñaarɗeeɗa siñaariɗ, ɓa woyeeɗa na Yeesu ŋ kurkohiŋ ɗe ŋ Adina wi ɗiindohan ini ɓay ɗe, te wa joyya raakoh Yerusalem.
32 Piyeer na huntoh ciŋ ɗe nikee neeheeɗa neeh nooɗiɗ. Ɓa yunukka, ɓa hotta siñaariŋ ndamiŋ Yeesu na ɓooɓa kanak ca jombee na ɗe. 33 Wa ƴaaɓa kanak ca na coote, Piyeer woosa Yeesu ne : « Kilifaani, wa baahiɗ ne ɓoo nik ndii, ɓoo haɓiɗ ɗiip kaahay, winoori nik wiŋ ɗa, winni nik wiŋ Musaa, wi tas nik wiŋ Ilyas. » Waaye a inheeɗi ini a woye.
34 Wa a na woye, eel saanginnda ɓa, taalubeeci neƴƴohha wa eela muur ɓa. 35 Ŋ ɗooƴ eela raakka hoosoora woo ne : « Yii, a yi kuɓkiŋ ngo ŋ tan, sikɗukaat a yi. » 36 Wa hoosoora kerhuk, ɓa hotta Yeesu kiik ce njong. Ŋ neeh caam, ɓa naandsukɗi ali ɓo' ini ɓa hot, ɓa ɗekkaa teɗ.