Piyeer woyiɗ ne a Yeesu Mucɗohi Gapohse
13 Yeesu kaɗta ɓak Seesare-Filip, wa a ree, a meekissa taalubeeciŋ ɗe ne : « Ɓooɓi na woye ne Kuɓkiŋ ɓoyi a yi ɓa ? »
16 Simong Piyeer loffa ɗe ne : « A fu Mucɗohi Gapohse, Kuɓkiŋ Koohi na pese16:16 Kuɓkiŋ Kooh : findi Fiis ci Hooliɗ ci woyoha, ŋ camba, e Kooh dong nikee te Yeesu yi Woo kiŋ ɗe, nikee nga ɗe (Saaŋ 1). Yeesu, findi a hayoh Adina, wa ɗalohiɗ na findi ɓooɓi na hayohe nga ; a raakɗi baabu ŋ kehƴi. A Kooh tum po a rimukka ŋ ɓitiɓ inhaaɗi ƴaar te malaakaani gapoh raakuukiŋ ɗe woo ne a hey ɓeeɗkohse Kuɓkiŋ yi Ɗafkiɗi (Macce 1:18-25; Luk 1:26-56; 2:1-20) kon ini a puloh ŋ Kooh weɗ tah a ɓeeɗkohsee Kuɓkiŋ Kooh. Kuɓkiŋ Kooh, wa tokisɗi ne Kooh ɓay faan a rimmba kuɓu na ɓitiɓ findi ɓo'.. »
Yeesu woyiɗ ŋ kakaan kiŋ ɗe na hultiŋ ɗe
21 Ini kooɗoh ndeem, Yeesu cammba woo woo jahran na taalubeeciŋ ɗe an : « Ŋ joyiɗ kaɗ Yerusalem, ŋ yaaɓ keeh-keeh ŋ yaah ciŋ yakak ci na kilifaaciŋ seeƴkiɗoh ciŋ waasiŋ Musaa na jangɗohoh ciŋ wa, ŋ apu te ŋ hultiɗu ŋ neeha kaahayɗoh. »
22 Piyeer gukka ɗe, ngaseeɗa ɗe an : « Kilifaani, Kooh mucɗaat ɗa nga ! Ineem rahsanɗi ɗa muk ! » 23 Waaye Yeesu heelukka, woosa ɗe ne : « Kurka ndii, kaɗa ŋ finhooso, seytaaniini ! Fu na jaɗɗee so fiir. Liiɓohaaɗiŋ ɗa hunɗi na wiŋ Kooh, fu na liiɓe findi ɓo'. »
24 Ƴutta, Yeesu woosa taalubeeciŋ ɗe ne : « Ɓo' nu waaɗ hun na so ɗah, a joyɗi liiɓ haf ce, a degkaat kurwaani aa hee daaƴohse, a ñaakiɗ to.
28 Ñam na woyee ɗu wa te wa keeh, ɓi ɓo' ɓii ŋ ndii ɓa kaananɗi muk te ɓa hotɗi Kuɓkiŋ ɓoyi hayee findi buur. »