Siñaarɗiŋ yaki Yeesu yak
1 Wa degga neeh yasna-yino, Yeesu ɓayya Piyeer na Saak na Saaŋ taambɗoh Saak, a kaɗta ɗaaya na ɓa ŋ ɗafuk tango njooliɗ ; 2 ndaam a ɓoƴsukka ŋ fikiiɓa, fikiiriŋ ɗe melciɗeeɗa findi nohi, kulɓaaciŋ ɗe nikka yaanow tar haa siñaar. 3 Ɗekka po woosuuɗ kanak teeɓukka ɓa, ɓa nikee Musaa na Ilyas, ɓa woyeeɗa na ɗe. 4 Ŋ ineem, Piyeer woosa Yeesu ne : « Kilifaani, wa baahiɗ ne ɓoo nik ndii, fu waaɗa ɗah ŋ hey haɓɗe ndii ɗiip kaahay, winoori nik wiŋ ɗa, winni nik wiŋ Musaa, wi tas nik wiŋ Ilyas. »
5 Wa a na woye ineem, eel hayya nga ɓa, wa siñaarɗeeɗa siñaariɗ, wa ulla ɓa. Hooso kerhukka ŋ ɗooƴ eela an : « Yii a yi Kuɓkiŋ ngo ŋ waaɗ keeh-keeh, yi neɓ po ŋ keeñ. Sikɗukaat ɗe ! » 6 Wa taalubeeci nikee nga kerah woo keem, ɓa tiitta keeh-keeh, ɓa keennda, ɓa ruɗta fikiiciŋ ɓa ŋ kehƴi. 7 Yeesu reɓpa laalla ɓa, a woosa ɓa ne : « Kurkaat, kinaat tiit ! » 8 Weɗ ɓa markoh, ɓa hotɗi ali ɓo' ɗal Yeesu kiik ce njong.
9 Wa ɓa ruhsee tangoora, Yeesu dennga ɓa ne : « Ini ɗu hot wii kinaata woo ali ɓo' po Kuɓkiŋ ɓoyi hultiɗu. » 10 Ɓa meekissa ɗe ne : « Wa ye tah jangɗohoh ciŋ waasiŋ Musaa woyee ne Ilyas joyiɗ hayis paaɗ17:10 Malasi 3:23 ? » 11 A loffa ɓa ne : « Ee ! Ilyas joyiɗ hay ne a doknoh in ci jen po ca yurah. 12 Waaye mi na woyee ɗu ne Ilyas hayiɗ, ɓooɓi inhisɗi ɗe, ɓa tummba ɗe ini neɓ ɓa, ɓa na hee name torhiɗoh Kuɓkiŋ ɓoyi ɗaa. » 13 Ŋ ndeem, ɓa inahha ne a na woyee ɓa Yahya Ɓoktohi.