Aasaŋ Yeesu ŋ Yerusalem
1 Yeesu na taalubeeciŋ ɗe taalndiɗta ŋ waas Yerusalem. Wa ɓa kaɗ po ɓa heeɗa ree, teemb kur kaŋ Betfase, ŋ sero Tangooraŋ-Oliiw-ca, Yeesu woossa kanak nga ɓa. 2 A woosa ɓa ne : « Kaɗaat ŋ kur ki ŋ fikiiɗu wii, ɗu ree rek ɗah, ɗu hey hote mbaam riɓ tokuuɗ nga na cumbriŋ ɗe. Toksaat ca, ɗu kom mbo ca ndii. 3 Te ɓo' meekis ɗu ɗah, woyaat ɗe ne : " A kilifaani etoh ca. " Ŋ ineem, a jaaran ɗu faɗ ɗu hay na ca. » 4 Ineem raakka ne ina woosuuɗa woyee raak :
5 « Woyaat kur kiŋ Siyong ne :
" Buuriŋ ɗa yii hay nga ɗa,
a ruhsiɗiɗ haf ce, a rap mbaam,
cumbur mbaam,
ɗoopaat sifoh.21:5 Sakriya 9:9 " »
6 Taalubeeca kanak ca kaɗta, ɓa haɓiɗta ina Yeesu nakee ɓa. 7 Ɓa ɓayya mbaama na cumbra, ɓa raɗta kulɓaacaŋ ɓa nga ca, Yeesu rappa. 8 Ɓo' laayiɗ ŋ mboolnda raɗiɗta ɗe kulɓaacaŋ ɓa ŋ waasa ; ɓum raɗɗeeɗa ɗe na saaf ciŋ kidig ci ɓa piike. 9 Mboolnda hunnda kaɗeeɗa, ɓum adugka Yeesu, ɓum ñaakeeɗa nga ɗe ; ɓa woyeeɗa ŋ ɗafka ne :
« Hosaana21:9 Hosaana : ŋ ɗeɓgaana, wa tokseen ne : "Woti-woti, mucɗa ɓoo." Wa nikee kiim Kooh. Waaye, wa kaɗta po wa nikka woo yakɗoha Kooh. setiŋ Dawuuda !
Ɓoyi na haye ŋ tiikiŋ Heɗi, a raakaat barke !21:9 Sabuur 118:26
Hosaana ŋ jol jol ɗafka ! »
10 Wa Yeesu aasee Yerusalem, kur ka jen yoondeeɗa yoond, ɓa woyeeɗa ne : « Ya ɓa yii ? » 11 Mboolnda loffa ne : « A Yeesu, Woosuuɗiŋ Kooh, yi puloh Nasareet ngaŋ Galile. »
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)