Yeesu woyiɗ ŋ jangɗohoh ciŋ waasi na Farisen ci
1 Ŋ finho ineem, Yeesu woyeeɗa na mboolnda na taalubeeciŋ ɗe, 2 an : « Jangɗohoh ciŋ waasi na Farisen ci lamiɗ Musaa ne ɓa teeɓoh waasi. 3 Kerhiɗaat ɓa te ɗu tumee in ci ɓa na woye jen, waaye kinaat mand na ɓa ŋ tumohaaɗ. Ɓa na woye woo, ɓa na tumeeɗi. 4 Ɓa na toke ɗuf ɓitiɗ, ɓa raanee ca ɓooɓi te ɓa waaɗɗi ca reɓ sah na lecem ndukun.
5 In ci ɓa na haɓɗe jen, ɓa na waake hotaat to nga. Hey ɗah, ɓa ɓaat angiɗ aayaaciŋ Fiis ci Hooliɗ ci na tokse ŋ puk na yaah,23:5 Rohƴiɗi 6:8; 11:18 ɓa ɓaat simbir-simbir ciŋ kulɓaaciŋ ɓa23:5 Kind ci 15:37-41 na naandsee ɓa nakoh ciŋ waasi. 6 Ɓa ɓeeɗku kañam yakak ɗah, ɓa na waaɗe ne ɓa ɓoofan ŋ ɗisik ci uup eɗu cir. Ɓa na name waaɗ nik ŋ fiki ɓooɓi ngaŋ sinaagog ci. 7 Ɓa na waaɗe ne ɓooɓi kañɗan ɓa yaah kanak ŋ ɗisik ci na toonohse ŋ kur te ɓa waaɗ ne ɓooɓi ɓeeɗkan ɓa "Rabbi" (weɗ jangɗohohi yakki).