Kilifaaci kooɗkiɗ ap Yeesu
1 Wa Yeesu ƴut woo woo ceem jen, a woosa taalubeeciŋ ɗe ne : 2 « Ɗu inhiɗ ne tas neeh kanak feetiŋ Paakiŋ26:2 Paak : Saafi inah feet Paak yino, wa nikka wiŋ Kerceen ci. Paakiŋ Kerceen ci puloh ŋ Paakiŋ Yawuut ci, weɗ ne, Paakiŋ Israayel ci. Ɓa cammbaa haɓiɗ ŋ jamanoonaŋ Musaa, mbeha Israayel ci puloh Misra. Waɗ Kooh woo ɓa ne, kahan nu nga ɗah, haɓɗaat mbuuru raakaaɗi lawiir, ɓa nam ap mbaal, ɓa ɓay ñif miŋ ɗe, ɓa reefa ŋ leentooni na ɓak ci kanak ciŋ buntaani. Ŋ wekaam, saaw ciŋ ɓi Misra jen kaannda, waaye ŋ kahan ci reefsee ñif, ali ɓo' kaaneeɗi nga (Pula 12). Yeesu, e woosuuɗi Yahya teek ɗe "Mbaaliŋ Kooh" (Saaŋ 1:29), te kakaan kiŋ ɗe, wa nikee ŋ feetiŋ Paak (Macce 27:15 ; Saaŋ 18:28), po a nikka kotii Mbaaliŋ Paaki asi. A yi kaan ne ñif miŋ ɗe min muciɗ ɓooɓi ŋ kakaan. Weɗ tah po Kerceen laayiɗ na woye feetiŋ kakaan kiŋ Yeesu na hultiŋ ɗe "Paak", findi feetiŋ Israayel ci maañiɗi. Yawuut ci ree ; Kuɓkiŋ ɓoyi hey eɗohse ne a daaƴu. »
3 Ŋ neeh ceem, kilifaacaŋ seeƴkiɗoh ca na yakak caŋ cuuɓi cohha ŋ kahan seeƴkiɗoha yakka, a teeksee Kayif. 4 Ɓa kerhiɗohha ŋ woo findi ɓa hee tume po ɓa amb Yeesu te ɓo' yeguu, ne ɓa apɗuk ɗe. 5 Waaye ɓa woyee ne wa joyɗi nik ŋ ɗooƴ feet ci, ɓa sangee ne ɗuuɗ raak ŋ ɗooƴ ɓooɓa.
Ɓitiɓ tumiɗ laackoloñ ŋ hafiŋ Yeesu
6 Waam, Yeesu kaɗta Betani ŋ kahan Simong Gaanaana, 7 ɓitiɓ hayya nga ɗe na buteel haɓɗohuuɗ albaatar26:7 albaatar : wa atoh moɗiɗ, yooɓiɗ pestu, wa na etohse haɓɗoha tumoha laackoloñ. tumiɗ laackoloñ ɗoɓiɗ, a yiiffaa ŋ hafiŋ Yeesu, raak ɗe ñameeɗa.
8 Taalubeeci hoteeɗa ŋ ineem, ɓa neɓuuɗi, ɓa woosa ne : « Wa ye tah ɗe yahrohe laackoloñi ɓarang ɓarang ? 9 Wa mineen toonohu kopor keeh-keeh, ñakiɗ ci eɗuu wa. »
10 Yeesu inheena, woosa ɓa ne : « Ɗu na yaaɓɗohe ɓitɓi ye ? A haɓɗiɗ to in ye baahan. 11 Ini kaɗ ŋ ñakiɗ ci, ɓa genan gen na ɗu waaye mi, ŋ heyɗi gene nik na ɗu. 12 Ŋ aami a aam mbo laackoloñi, a na kooɗkiɗe acuukiŋ ngo. 13 Ñam na woyee ɗu wa te wa keeh, ɗisik nu Yegɗohiŋ Mucii woyu ŋ adinaani jen ɗah, ini a haɓiɗ hey woyse nga, naandsukohaa ɗe. »
Yudaa tufkiɗ ne a wor Yeesu
14 Weɗi Yudaa Iskaryot, yino ŋ Apootar ci ndaŋkiyaah na kanak ci (12), kaɗoh ŋ kilifaacaŋ seeƴkiɗoh caŋ waasiŋ Musaa 15 a woosa ɓa ne : « Ɗu na hee so ye eɗe ne ŋ deg Yeesu ŋ yaah ciŋ ɗu ɗah ? » Ɓa eɗta ɗe hanjar haalis ndaŋkiyaah-kaahay (30). 16 Jaarra a sekɗoheeɗa findi a eɗndohohan ɗe.
Yeesu na taalubeeciŋ ɗe ŋ feetiŋ Paak
17 Ŋ mbehi koc ŋ feetiŋ Mbuuruuci raakaaɗi lawiir26:17 Pula 12:1-28 ci, taalubeeci hayya woosa Yeesu ne : « Fu waaɗ ne ɓoo haɓɗiɗohan ɗa kañam kiŋ Paak nde ? » 18 A woosa ne : « Kaɗaat Yerusalem, ŋ kahan diw, woyaat ɗe ne Jangɗohohi woo ne jamanooniŋ ɗe reɓiɗ, a waaɗ haɓiɗ feetiŋ Paak, a yi na taalubeeciŋ ɗe, ŋ kahan fu. » 19 Taalubeeci tummba findi a woyoh ɓa, ɓa kooɗkiɗta kañam kaŋ Paak.
20 Wa niina ree, Yeesu ɓooffa na Apootar ci ndaŋkiyaah na kanak ci (12) ne ɓa ñam. 21 Wa ɓa ñamee a woosa ɓa ne : « Ñam woo ɗu wa te wa keeh, yino nga ɗu hey yo eɗndohe. » 22 Ɓa soossa sem, yaa nu nga woyeeɗa ne : « Kilifaani, mbaar a mi haa ? » 23 A loffa ɓa ne : « Ɓoyi ɓek yaahiŋ ɗe na so ŋ booli, a yi na hee so eɗndohe. 24 Kuɓkiŋ ɓoyi hey kurke nga findi Fiis ci woyoha nga ɗe, waaye mas ɓoyi na hee ɗe eɗndohe ŋ ɓi sang ɗe, ini ngisohee ŋ ɓoyeem weɗ ne a rimkuu. » 25 Jaarra, Yudaa yi eɗndohan ɗe meeksohha an : « Jangɗohohi, mbaar a mi haa ? » Yeesu woosa ɗe ne : « A fu woya ! »
Yeesu tufkiɗiɗ kañam naandsukohaa ɗe
26 Wa ɓa ñame, Yeesu ɓayya mbuuru ; wi a corkiɗ Kooh po ƴutta a poɓtohhaa, a eɗta taalubeeci wa, a woosa ne : « Ɓayaat ɗu ñam, wii wa faaniŋ ngo. » 27 Ƴutta a ɓayya kaas ; wi a corkiɗ Kooh po ƴutta, a woosa ne : « Ɓayaat ɗu an nga, ɗu jen, 28 wii wa ñif miŋ ngo, ñif miŋ Ambtiɗohi, wi aamu wuu ɓi ɓo' laayiɗ ne bakaaɗ ci ɗaasohu.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)