36 Yeesu hunnda na ɓa, kaɗeeɗa po reesa ɗiska na woyse Getsemane, a woosa ɓa ne : « Ɓoofaat ndii po ŋ kaɗ kiima Kooh nden, ŋ hay. » 37 A ɓayndohha Piyeer na kuɓuuciŋ Sebede kanak ci, a kaɗta ƴissuut, a raakka yeg-yeg miskiɗ ŋ ɗooƴ ce, a jaahiɗta. 38 A woosa ɓa ne : « Ɗiski wa nik ndii faaniŋ ngo goy goy po mi yii heeɗa kaane, tasaat ndii ɗu irin na so. »

39 Wi a woo ineem, a ɓaatta kaɗ ƴissuut, a raɗukka ŋ kehƴi a kiimeeɗa Kooh an : « Baabiŋ ngo, wa min nik ɗah, kaasiŋ miskiɗii usaat to ! Waaye wa ka nik findi ŋ waaɗoh, wa nikaat findi fu waaɗoh. » 40 Wi a dokuk ŋ taalubeeci kaahay ci, a raakka ɓa neeheeɗa, a woosa Piyeer ne : « Ɗu minɗi sah irin na so ini ree wahtu ! 41 Kinaat neeh, kiimaat Kooh a ndengiɗ ɗu po ɗu keenuu ŋ fiir ; waaɗ-waaɗi wii nga waaye faan ci raakɗi hatil. »

42 A kaɗissa waasi kanakɗoh a kiimissa Kooh an : « Baabiŋ ngo, nik ne kaasii minɗi coot feeh ŋ anɗaa ɗah, wa raakohaat findi fu waaɗoh. » 43 Wa a dokkis nga ɓa, a raakissa ɓa neeheeɗa, raak ɓa pani'uuɗ po has ciŋ ɓa aaykohha.

44 A faɗta ɓa ndeem, a usissa ƴissuut, a kiimissa waasi kaahayɗoh, a woyissa ina a woye. 45 Ƴutta a kaɗissa ŋ taalubeeca a woosa ɓa ne : « Ɗu ɓii neeh, ɗu ɓii iɗsiɗuk ! Weɗɗi, ɗiski wa nik wahtuuni reyiɗ, Kuɓkiŋ ɓoyi faɗuuɗ ŋ yaah ciŋ bakaaɗoh ci. 46 Kurkaat ɓoo kaɗ. Markaat ! Yi joy yo eɗndoh a yi ! »