Mateus 4

Seytaani jaɗɗiɗ Yeesu fiir

1 Ŋ ineem, Fuuɗsi Hoolohngaani, Fuuɗsiŋ Kooh ɓayya Yeesu ŋ nduufa, ne Seytaani jaɗiɗ ɗe fiir. 2 A orra noh ndaŋkiyaah-nikiis (40) na wek ndaŋkiyaah-nikiis (40) ; ŋ mirndaani a aɗukka. 3 Seytaani, yi na jaɗɗohe fiir, reɓpa woosa ɗe ne : « Nik ne fu Kuɓkiŋ Kooh ɗah, woya atoh cii, ca ɓoƴsuk mbuuru. » 4 Yeesu loffa ɗe ne : « Fiis ci Hooliɗ ci woyiɗ ne :

" Ɓo' na pesohe mbuuru dong haa,

waaye na woo nu nik ne wa puloh ŋ nguɓiŋ Kooh ɗah.✝4:4 Rohƴiɗi 8:3 " »

5 Seytaani ɓayya ɗe Yerusalem, ŋ jol Kahnaŋ Kooh*4:5 Kahan Kooh : farañse na woyee wa "temple". Kahan Kooh wa nikee inaa yakiɗ. Wa nikee tuuƴ angiɗ na ɗisik ca wilee wa. Tuuƴa raakee ɓak kanak, saɓsohuuɗ na rido (Pula 26:33). Ŋ ɗooƴa ɗooƴa, weɗ teeksee Ɗiska Hoolohngaana ; a seeƴkiɗohi yakki dong meeɗ aas nga te wa meeɗ nik waas yino ŋ kiis ki (Lewiici 6). Ɓaki tas teeksee Ɗiska Hooliɗa. A seeƴkiɗohi joy panguk mbehiŋ ɗe dong (Luk 1:8-9) na aase nga ne a suus cuuraay (Pula 30), a fuuɗ laampa (Pula 27:20-21), a deg mbuuruuci (Pula 25:30). Raakka ɗiska wila te seeƴkiɗoh ci dong na nike nga ; seeƴkohaana nikee nga (Pula 40:6). Seeƴkohaaneem, weɗ dong ɓooɓa joye seeƴkoh. Kahniŋ Kooh weem, wa wa koc haɓɗu, wa nikee ɗiip. E Musaa haɓɗee wa. A marak ŋ wa Kooh teeɓee ɗe ŋ ɗafuk tangoora (Pula 26:30) po wiŋ kehƴi nikka ñaamaariŋ wa keeh-keeha nik ŋ Eel ci (Heber ci 8:5; Teeɓ ki 11:19). Wi Suleymaan hay, a taɓahhaa (1 Buur ci 5–6). Ɓi Babilon yahrohhaa (2 Nguur ci 36:19). Weɗi Israayel ci tufkiɗohisa (Esdaras 1–6). Gerek ci yahrohissaa. Buur, ŋ buur ci teeksee Herod, tufkiɗissaa (Saaŋ 2:20), weem, weɗ nikee Kahan Kooh ŋ jamanoonaŋ Yeesu. Ŋ jamanoonaam, ɗiska ƴaar ciŋ Israayel nike, weɗ wilee ɗiska seeƴkiɗoh ca nike. Aasohaanaŋ ɗiskeem weɗ ɗiska ɓitiɓ ca meeɗ nik. Ina wilee wa ɓak po ɓak weɗ nikee ɗiskaŋ ɓooɓa nikɗi Yawuut. Wa hannda wilɗu jameet na miir raakiɗ yahndeer ŋ ɓak ci nikiis ci jen. ; 6 a woosa ɗe ne : « Nik ne fu Kuɓkiŋ Kooh ɗah, faɗsuka ŋ kehƴi. Fiis ci Hooliɗ ci woyiɗ ne :

" Kooh hey nake malaakaaciŋ ɗe,

ca ɓay ɗa ŋ yaah ciŋ ca

po kot ciŋ ɗa laɓkanɗi ŋ atoh.✝4:6 Sabuur 91:11-12 " »

7 Yeesu loffa ɗe ne : « Fiis ci namiɗ woo ne : " Fu joyɗi markisuk Heɗ ɓoo, Koohiŋ ɗa.✝4:7 Rohƴiɗi 6:16 " » 8 Seytaani rapɗissa ɗe ŋ jol tango njooloh na njooloh. A teeɓpa ɗe nguur ciŋ adinaani jen na yaki ca yak. 9 A woosa ɗe ne : « In cii jen, fu ƴekiɗ to ne fu ñaamuk ko ɗah, ŋ hey ɗa ca one. » 10 Yeesu loffa ɗe ne : « Seytaani, us so ! Fiis ci woyiɗ ne : " Ƴekɗa Kooh Heɗ fu, te fu ñaamuk a yi dong.✝4:10 Rohƴiɗi 6:13 " » 11 Weɗ Seytaani faɗoh ɗe ndaam, jaarra malaakaaca hayya, taambkoheeɗa ɗe.