13 'A Kristus, ngene wo sibalangu yoḏu’u! Ngoi, Paulus to sengene toma salib di’a ngini?! So’o gena ua! Ngini ni sanga baptis ua ra Paulus 'ai lomanga?!

14 Ngoi to sibere ie murasa ma la ra Ma Jou’ongu Madutu sababu taninga sigolona ngoi tini baptis ngini ua, ḏuga-ḏuga pa’i 'a Krispus re 'a Gayus ḇato.✝1:14 Som. 18:8, 19:29; Rom. 16:23 15 Sababu gena-ge, matengo i’a mai ua nga’unu 'o kanau mangale ngoi to baptis unanga ra ngoi 'ari lomanga. 16 (Oh ya, nange-ne kara ngoi ta si’elingi ie, 'a Stefanus 'ai ngitu re ngale ngoi ta’u baptis, mada’a ma lelegu ḏi’i ta 'elingi riwara.)✝1:16 1Kor. 16:15 17 Kristus 'o 'utusu ngoi di’a to baptis ngowa’a ua, mada’a di’a to singadolo Habari Roanga ra Ma Jou’ongu Madutu tala. Mada’a ngoi ta pake ua demo ga’a manusia 'aḏi ta’ajiri 'akala soro’unu. Sababu na’o ngoi to 'a’a so’o gena-ge ngowa’a 'aḏi basono ua Yesus 'ai se-sengene toma salib ma kuasa.