1 Korintus 12

Lese ma bageanga lai repe, mada’a pa’i lese rimoi ḇato

12 Ngene, ga’a rewo marimoi ra Kristus, ma tero sa’olo manusia manga lese. Pa’i lese rimoi ḇato mada’a lese ma bageanga ma repe. Kalaha lese ma bageanga lai repe mada’a bageanga gena-ge, 'i dadi lese rimoi ḇato.✝12:12 Rom. 12:4-5 13 So’o gena ḏi’i, ngene bae ngowa’a Yahudi, bae ngowa’a Yahudi ua, ngowa’a budaka, bolo budaka ua, ngene mo-moini wo dadi ma tero sa’olo lese rimoi ga’a 'i marimoi ra Kristus. Gena-ge 'i dadi wakutu ngene wo sanga baptis rema Ngagara 'Ofi-'Ofi ga’a 'i tegoro ra ngene matengo re matengo nanga 'akala re sinyingara ma dara.

14 Ma lese pa’i bageanga rimoi ḇato ua, mada’a 'age bageanga ma repe toma lese. 15 Si’ade-'ade, rou 'i kanau, "Ngoi ne giama ua, dadi ngoi to osama nyo-nyoimi ua toma lese." Kalaha rou ne giama ua, rou 'i osama nyo-nyoimi ḏi’i toma lese. 16 Si’ade-'ade i’a, ngau’u 'i kanau, "Ngoi ne la’o ua dadi ngoi to osama nyo-nyoimi ua toma lese." Kalaha ngau’u ne giama ua, ngau’u 'i osama nyo-nyoimi ḏi’i toma lese. 17 Si’ade-'ade i’a, lese rimoi mo-moini pa’i la’o ḇato, ma duhu sa’olo lese gena-ge 'i 'isene?! Bolo si’ade-'ade i’a lese rimoi pa’i ngau’u ḇato, ma duhu sa’olo lese gena-ge 'i tumese?! 18 Mada’a momongolo ua ngene wo oḏi’i masiretene mangale Ma Jou’ongu Madutu 'a si’aturu lese ma bageanga mo-moini mete’e Unanga 'ai mau. 19 Na’o mo-moini gena-ge pa’i lese ma bageanga rimoi ḇato, ma lese 'i cua! 20 Dadi bageanga ma repe, mada’a ma lese pa’i rimoi ḇato.

21 Sababu gena-ge, awa la’o 'i kanau toma giama, "Ngana, ngoi tini paralu ua!" Re awa sae’e 'i kanau toma rou, "Ngana, ngoi tini paralu ua!" 22 Siḏibo ḏi’i, lese ma bageanga ga’a wa ta’ajiri 'i mereoso, ngene wa paralu masala; 23 re lese ma bageanga ngene wa ta’ajiri kama ijana ua, ngene wa tailako masala. Lese ma bageanga ga’a ngowa’a ya oḏi’i yoḏu’u, ngene wa sipake pakeanga. 24 Lese ma bageanga ga’a wa oḏi’i i’a lai rousu, ngene wa kadiarata riwara. Ma Jou’ongu Madutu 'a sifato ḏu-ḏuanga ḏua mete’e Unanga 'ai mau, la ngene wo kadiarata la-la bageanga ga’a ngene wa ta’ajiri ma ijana cua bolo mereoso. 25 Sababu gena-ge, lese sibalangu yoḏu’u mada’a bageanga re bageanga balasu 'i ma’u tailako i’a re ino: 26 Na’o bageanga rimoi enanga 'i siḏi, bageanga mo-moini 'i basono siḏi. Na’o bageanga rimoi ngowa’a ya sitoro, bageanga mo-moini 'i maroanga.

27 Ioronongoḏu ngo-ngaku rimoi, ngini mo-moini ma tero sa’olo Kristus 'ai lese re matengo re matengo ni dadi ma tero sa’olo Unanga 'ai lese ma bageanga.