Dadalara
1 Si’ade-'ade i’a, ngoi nga’unu to sikanau manusia mo-moini manga demo bolo mala’ekata-mala’ekata ma demo ḏi’i. Mada’a na’o 'ari dadalara toma ngowa’a lelegu 'i cua, ngoi to kanau ma tero ḇato sa’olo saragi ma iḏingi, ma ngale 'i cua. 2 Si’ade-'ade i’a ngoi rari kuasa di’a ta siajele habari da’u ra Ma Jou’ongu Madutu tala. Re ta sahe wo-waro mo-moini, re ba-banari lai ngido re 'ari ngo-ngaku lai te’e ra Ma Jou’ongu Madutu singadolo nga’unu to parenta kie 'i malage. Mada’a na’o 'ari dadalara toma ngowa’a lelegu 'i cua, ngoi ngowa’a ma pake ua.13:2 Mat. 17:20, 21:21; Mrk. 11:23 3 Si’ade-'ade i’a 'ari 'ori i’a rana mo-moini ta sibalangu di’a ngowa’a ma dinga’unu ua re to pula’a 'ari lese di’a ngowa’a ya tau’u sababu ngoi to mete’e Yesus. Mada’a 'ari dadalara di’a ngowa’a lelegu 'i cua, mo-moini gena-ge ma faeda ri cua.
4 Matengo ga’a 'o dadalara ngowa’a lelegu, unanga gena-ge 'ai 'akala ḇanyo, 'ai 'akala lai rousu, ham-ham ua, matoro ua re momole ua. 5 'Ai de’oso re ḏegoro lai rousu toma ngowa-ngowa’a lelegu, disa pa’i 'ai paralu ḇato ua, capati ruta ua, gogono 'akala re sinyingara ua. 6 Matengo ga’a 'o dadalara ngowa’a lelegu, 'o sanangi ua na’o ngowa’a lelegu 'aḏi 'a’a 'ori i’a ma jira. Mada’a 'o maroanga pa’i na’o ngowa’a lelegu 'aḏi 'a’a 'ori i’a ma la-la. 7 Unanga 'o tahana talaḏi 'oru ḇato toma ngowa’a lelegu ino, 'o ngaku 'oru ḇato ga’a la-la mangale ngowa’a lelegu. Unanga 'o masinganono tau-taunu ngowa’a lelegu manga de’oso re ḏegoro 'i dadi la-la. Re 'o pake 'akala ḇanyo tau-taunu toma ngowa’a lelegu.