1 Coríntios 7

So-sano mangale molo’ara

1 Ioronongoḏu ngo-ngaku rimoi 'oru ga’a ngini ni lefo taninga surata ma dara mangale molo’ara ma 'atoranga, nange-ne ngoi ta siajele ra ngini: Na’o na-nau’u matengo 'o molo’ara ua, gena-ge 'i rousu. 2 Mada’a 'age rema ngowa’a manga repe 'aḏi sudala. Sababu gena-ge, na-nau’u matengo re matengo balasu remanga were’a, re we-were’a matengo re matengo balasu remanga nau’u. 3 Nau’u balasu otu malomu tai were’a, re were’a balasu otu malomu tami nau’u. Ngowa’a ga’a raḏi molo’ara enanga ma duhu balasu so’o gena-ge. 4 Sababu were’a 'ami lese di’a pa’i munanga masiretene ḇato ua, mada’a 'ami lese di’a 'ami nau’u ḏi’i. So’o gena-ge ḏi’i, nau’u 'ai lese di’a pa’i unanga masiretene ḇato ua, mada’a 'ai lese di’a 'ai were’a ḏi’i.

5 Awa ni ma’u ki-kiḏanga matengo re matengo bae nau’u toma were’a, bae were’a toma nau’u. Nyengara ḇato na’o ngini nga muḏiḏi ni ma’u fakati ni otu malomu ua, dadi ni manyiata ra Ma Jou’ongu Madutu. Mada’a ma 'orasa ti’ara awa! Togumu i’a ngini ni otu malomu ḏi’i. Dadi awa-awa ni sanga bo-baja toma 'Iblisi sababu ngini nga’unu ua ni manahana ninga lese ma nyafusu.